ملک بھر میں کورونا کے بڑھتے کیسز کے سبب ریاستی حکومتیں نیند سے بیدار ہوگئی ہیں، اور اس سلسلہ میں شہر کی معزز شخصیات کے درمیان میٹنگس منعقد کرتے ہوئے احتیاطی تدابیر اور اس سے نمٹنے کے لیے لائحہ عمل تیار کیا جارہا ہے۔ اس حوالے سے گوتم بدھ نگر نوئیڈا کے ڈی ایم سہاس ایل وائی نے منگل کے روز مذہبی پیشواؤں کے ساتھ کیمپ آفس میں ایک اہم نشست منعقد کی۔
اس اہم اجلاس میں اتر پردیش کے وزیر اعلیٰ یوگی آدتیہ ناتھ کا براہ راست پیغام بھی سنوایا گیا۔ اس موقع پر ڈسٹرکٹ مجسٹریٹ نے تمام مذہبی رہنماؤں سے درخواست کی کہ تمام دھرم گرو (مذہبی پیشوا) اپنی اپنی سطح پر حکومت کے ٹیکہ کاری اتسو کو کامیاب بنانے میں اپنا کلیدی کردار ادا کریں اور ضلع کے عوام کو کورونا وائرس کے انفیکشن سے محفوظ بنانے میں اپنی شراکت درج کرائیں۔
