دہلی میں نربھیا عصمت دری اور قتل معاملے کے قصوروار پون کمار کا پھانسی سے بچنے کا ایک اور ہتھکنڈہ آج اس وقت بے کار گیا جب سپریم کورٹ نے جرم کے وقت نابالغ ہونے کے اس کے دعوے سے متعلق نظرثانی کی عرضی مسترد کردی۔
جسٹس آر بھانومتی، جسٹس اشوک بھوشن اور جسٹس اے ایس بوپنا کی خصوصی بنچ نے پون کی نظرثانی کی عرضی یہ کہتے ہوئے مسترد کردی کہ اس میں کوئی دم نہیں ہے۔
اس سے پہلے عدالت عظمیٰ نے گذشتہ بیس جنوری کو اس سے متعلق ایس ایل پی مسترد کردی تھی اور دہلی ہائی کورٹ کا اس معاملے میں 19 دسمبر 2019 کا فیصلہ برقرار رکھا تھا۔
بنچ کی طرف سے جسٹس بھانومتی نے فیصلہ سناتے ہوئے کہا کہ پون کے نابالغ ہونے کا دعویٰ نچلی عدالت نے پہلے ہی مسترد کردیا ہے اور کہا کہ اس عرضی پر غور کرنے کے دعوے کی کوئی بنیاد نظر نہیں آتی ہے۔
پون نے ہائی کورٹ کے گذشتہ 19 دسمبر کے اس فیصلے کو خصوصی عدالت میں چیلنج کیا تھا جس نے واردات کے وقت اس کے نابالغ ہونے کی دلیل مسترد کردی تھی۔
