پولیس نے دوران لاک ڈاؤن کئی ایسے کام کیے جو لوگوں میں پزیرائی کا سبب بنا۔ نیا معاملہ دہلی کے مشرقی ضلع کے پریت وہار علاقے کا ہے جہاں 90 سالہ اندرا خیمانی بی پی زیادہ بڑھ جانے سے بے ہوش ہو کر زمین پر گر گئی تھیں۔ حالت تھوڑی بہتر ہونے پر پولیس کو کال کی۔
ایس ایچ او پریت وہار مہندرا مشرا اپنی ٹیم کے ہمراہ وہاں پہنچے اور ضعیفہ خاتون کو ہسپتال لے گئے۔ پولیس اہلکا ر رات بھر خاتون کے ساتھ رہے۔ اگلے دن ہسپتال سے چھٹی ہونے پر انہیں گھر لے گئے۔ بعدازاں، ان کے لیے ضروری کھانا اور پھل بھی مہیا کرائے اور مسلسل ان کی خیریت لیتے رہے۔ اندرا ہیلتھ سروس میں ڈپٹی ڈائریکٹر جنرل کے عہدے سے ریٹائر ہوئی ہیں۔ ان کے شوہر انتقال کر چکے ہیں اور ان کی کوئی اولاد نہیں ہے۔
اس کے علاوہ ایسٹ دہلی کے آئی پی ایکسٹینشن میں ایک بزرگ جوڑا جو اکیلا ہی رہتا ہے۔ انہوں نے اپنی 50 ویں سالگرہ پارٹی منانے کے لیے ہال بک کر رکھا تھا۔ لیکن لاک ڈاؤن سے ان کی خواہش پر پانی پھر گیا۔ اس کی اطلاع پر مدھو وہار پولیس کو دی گئی۔ پولیس فوراً حرکت میں آئی اور اس جوڑے کے لیے کیک اور پھول کا ہار لے کر پہنچ گئی۔ اس طرح سبھی نے مل کر اس بزرگ جوڑے کی 50 ویں سالگرہ منائی۔
