نئی تعلیمی پالیسی سے تعلیم میں تبدیلیاں آئیں گی: وزیر تعلیم

ڈاکٹر رمیش پوکھریال نے آج قومی تعلیمی کانفرنس سے خطاب کرتے ہوئے کہا کہ نئی قومی تعلیمی پالیسی تعلیم کے میدان میں تاریخی تبدیلیاں لائے گی۔

دہلی: مرکزی وزیر تعلیم ڈاکٹر رمیش پوکھریال 'نشانک' نے آج کہا کہ نئی قومی تعلیمی پالیسی جامع ، ہمہ جہت اور مستقبل کی پالیسی ہے جس کے ذریعہ تعلیم کے میدان میں تاریخی تبدیلیاں لانے کی کوشش ہوگی۔

ڈاکٹر 'نشانک' نے اسوچیم کے زیر اہتمام منعقدہ 14 ویں قومی تعلیمی کانفرنس سے خطاب کرتے ہوئے کہا کہ قومی تعلیمی پالیسی ڈھائی لاکھ گرام پنچایتوں، 6600 بلاکوں، 6000 شہری بلدیاتی اداروں، 676 اضلاع اور تقریبا دو لاکھ تجاویز موصول ہونے کے بعد تشکیل دی گئی ہے۔

انہوں نے کہا کہ 'وزیر اعظم نریندر مودی نے اس پالیسی کے بارے میں کہا ہے کہ یہ بھارتی طلبہ کو عالمی شہری بنانے اور اکیسویں صدی کے لئے ان کو تیار کرنے کا کام کرے گی۔ اس کے علاوہ یہ پالیسی قابل رسائی، معیار، کفایتی اور احتساب کے ٹھوس اصولوں پر مبنی ہے۔

مرکزی وزیر نے نئی قومی تعلیمی پالیسی کے التزامات پر تفصیل سے وضاحت کرتے ہوئے کہا کہ اس میں 'کیاسوچنے کے بجائے کس طرح سوچنے' پر فوکس کیا گیا ہے۔