مرکزی وزیر مختار عباس نقوی نے آج حضرت نظام الدین اولیا کی درگاہ پر زیارت کے بعد کہا کہ 'مقدس حضرت نظام الدین درگاہ کی زیارت کی اور ملک کے لوگوں کی صحت و سلامتی کی دعا مانگی'۔
انہوں نے کہا کہ عظیم صوفی سنت حضرت نظام الدین کے انسانیت، ہم آہنگی، اتحاد کا سبق، پیغام مذہب، علاقہ اور ملک کی سرحدوں سے اوپر ہے۔ تمام انسانیت کی فلاح وبہبود کے لئے ان کی تعلیمات کو ہمیں مکمل ایمانداری سے آگے بڑھانا چاہیے۔
مرکزی وزیر نے کہا کہ ملک کے تمام مذہبی، سماجی اداروں اور مقامات نے کورونا کے دورمیں اعتدال پسندی، احتیاط اور نظم و ضبط کی بہترین مثال پیش کی ہے جس کے سبب اتنے بڑے ملک میں کورونا کو کنٹرول کیا جاسکا۔
انہوں نے کہا کہ ہندوستان ایسا ملک ہے جہاں دنیا کے تقریباً تمام مذاہب کے عقیدت مند رہتے ہیں۔ کورونا کے دور میں تمام مذاہب کے تہوار آئے لیکن ملک کے لوگوں کی اعتدال پسندی، احتیاط، حساسیت کے عزم کا نتیجہ ہے کہ تمام نے رہنما ہدایات پر عمل بھی کیا اور کورونا انفیکشن کو روکنے میں ساتھ دیا۔
خیال رہے کہ کورونا وبا کے سبب تقریباً چھ مہینے سے عام لوگوں کی زیارت کے لئے بند نظام الدین درگاہ کو آج کھولا گیا ہے۔ کورونا کے خطرات کے پیش نظر درگاہ آنے والوں کے لئے تمام احتیاطی اقدامات کئے گئے ہیں۔
