نئی دہلی: قومی دارالحکومت دہلی میں برفیلی ہواؤں کے باعث لوگوں کو سردی سے راحت نہیں ملی اور کرسمس کے موقع پر لوگوں کو سردی کا سامنا کرنا پڑا۔ اس کی وجہ سے بہت سے لوگوں نے اتوار کو گھر پر گزارنے کو ہی ترجیح دی۔ اس سیزن میں پہلی بار قومی راجدھانی میں دن کے وقت کچھ مقامات پر شدید سردی کی لہر برقرار رہی۔ کئی مقامات پر زیادہ سے زیادہ درجہ حرارت 15 ڈگری سیلسیس سے نیچے رہا۔ اس کے ساتھ ہی بعض مقامات پر کم سے کم درجہ حرارت بھی 3 ڈگری کے آس پاس رہا۔ سردی کی لہر کا یلو الرٹ جاری کر دیا گیا ہے۔ منگل سے سردی سے معمولی راحت متوقع ہے۔ yellow alert in Delhi
محکمہ موسمیات نے آج (پیر)، 26 دسمبر کو بھی دہلی-این سی آر، اتر پردیش، ہریانہ اور پنجاب میں ٹھنڈی ہوائیں چلنے کے ساتھ کم سے کم درجہ حرارت میں کمی کی پیش گوئی کی ہے۔ نئے سال پر موسم سرما کی شدت میں مزید اضافہ متوقع ہے۔ محکمہ موسمیات نے اگلے پانچ دنوں تک ہریانہ، پنجاب، اتر پردیش اور راجستھان میں سردی کی لہر کے ساتھ دھند کا الرٹ جاری کیا ہے۔ محکمہ موسمیات کے مطابق اتوار کو دارالحکومت میں زیادہ سے زیادہ اور کم سے کم درجہ حرارت میں تیزی سے کمی دیکھنے میں آئی۔ کم سے کم درجہ حرارت 4 ڈگری تک گرگیا۔
اتوار کو زیادہ سے زیادہ درجہ حرارت 16.2 ڈگری ریکارڈ کیا گیا۔ یہ معمول سے 5 ڈگری کم ہے۔ اس کے ساتھ ہی کم سے کم درجہ حرارت 5.3 ڈگری ریکارڈ کیا گیا۔ یہ معمول سے 3 ڈگری کم رہا۔ ہوا میں نمی کا تناسب 59 سے 97 فیصد رہا۔ محکمہ موسمیات کے مطابق پالم میں زیادہ سے زیادہ درجہ حرارت 14.1 ڈگری، گروگرام 15 ڈگری، غازی آباد 14.5 ڈگری، جعفرپور 13.7 ڈگری، منگیش پور 13.4 ڈگری، نجف گڑھ 15.5 ڈگری، نوئیڈا 15.6 ڈگری، میور وہار 15 ڈگری رہا۔ دوسری طرف لودی روڈ کا کم از کم درجہ حرارت 5 ڈگری، آیا نگر کا 3.5 ڈگری اور رج کا 3 ڈگری رہا۔
یہ بھی پڑھیں: Kashmir Weather Update کشمیر میں سردی کی لہر جاری، سرینگر سرد ترین رات ریکارڈ
اس بار دارالحکومت میں سردی کی لہر دیر سے شروع ہوئی ہے۔ 2021 میں سردی کی پہلی لہر 18 دسمبر کو ریکارڈ کی گئی تھی۔ اس وقت دہلی کا درجہ حرارت 17.8 ریکارڈ کیا گیا تھا۔ آئندہ پیر کو آسمان صاف رہے گا۔ گھنی دھند برقرار رہ سکتی ہے۔ زیادہ سے زیادہ درجہ حرارت 19 اور کم سے کم 4 ڈگری کے آس پاس رہنے کا امکان ہے۔ دوسری جانب 27 دسمبر سے سردی میں معمولی راحت مل سکتی ہے۔ زیادہ سے زیادہ درجہ حرارت 20 اور کم سے کم درجہ حرارت 5 ڈگری تک رہ سکتا ہے۔ اس کے ساتھ ہی 28 سے 31 دسمبر کے درمیان زیادہ سے زیادہ درجہ حرارت 20 سے 21 ڈگری اور کم سے کم درجہ حرارت 6 سے 7 ڈگری کے درمیان رہ سکتا ہے۔ محکمہ موسمیات کا کہنا ہے کہ سرد دن، سردی کی لہر اگلے دو دنوں تک برقرار رہنے اور اس کے بعد کم ہونے کی توقع ہے۔
یو این آئی
