مرکزی حکومت نے کورونا وبا سے نمٹنے کے اقدامات کے تحت آجرین سے کہا ہے کہ وہ تمام ملازمین کے موبائل فون پر آروگیہ سیتو ایپ ڈاون لوڈ کرنے کو یقینی بنائیں۔
وزارت داخلہ کے مطابق کورونا وائرس کے انفیکشن کی سائیکل کو توڑنے کے لیے دفاتر میں کام کرنے والے تمام ملازمین کو آروگیہ سیتو ایپ فوری طور پر اپنے فون میں ڈاون لوڈ کرنا چاہئے جبکہ اس کا استعمال حکومت انفیکشن کے معاملات میں رابطے کا پتہ لگانے اور صارفین کو طبی مشورے فراہم کرنے کے لیے کررہی ہے۔
وزارت نے ضلعی انتظامیہ کے عہدیداروں کو ایپ انسٹال کرنے کا مشورہ دیتے ہوئے کہا کہ اسے اپ ڈیٹ کرتے رہیں تاکہ بروقت طبی امداد فراہم کی جاسکے۔
ایم ایچ اے نے اپنے تازہ رہنمایانہ خطوط میں کہا ہے کہ ’جہاں تک ممکن ہوسکے، گھر سے کام کرنے کے طریقہ کار پر عمل کیا جانا چاہئے‘۔
وزارت داخلہ نے آجرین سے کہا ہے کہ وہ کام کے مقام پر صفائی ستھرائی کا خاص خیال رکھے، ملازمین کی تھرمل اسکریننگ کریںاور ہینڈواش وغیرہ کی فراہمی کو بھی یقینی بنائیں۔
کام کے مقامات پر تعینات ذمہ داروں سے کہا گیا ہے کہ ملازمین کے مابین مناسب فاصلہ اور لنچ کے اوقات میں بھی سماجی فاصلہ کے اصول کو یقینی بنائیں۔
