'برڈ فلو سے بچنا ہے تو مرغا کھانے سے پرہیز کریں'

بھارت کی مختلف ریاستوں میں گزشتہ دس دنوں کے دوران لاکھوں پرندے مر چکے ہیں۔ چار ریاستوں اترپردیش، مدھیہ پردیش، کیرالہ اور راجستھان میں برڈ فلو کی باضابطہ تصدیق بھی ہو چکی ہے۔ اس کے بعد حکومت اس نئے بحران پر قابو پانے کے لیے اقدامات کر رہی ہے۔

کورونا وائرس سے پیدا شدہ بحران کے بعد اب بھارت پر برڈ فلو نے حملہ کیا ہے۔ برڈ فلو کے پیش نظر اب تک مختلف ریاستوں میں ہائی الرٹ جاری کیا جا چکا ہے۔

قومی دارالحکومت دہلی سے تقریباً ڈھائی سو کلومیٹر دور ہریانہ کے پنچکولہ میں چار لاکھ سے زیادہ مرغیاں ہلاک ہوگئی ہیں۔ حالانکہ ہریانہ نے ابھی تک کا باضابطہ برڈ فلو کی تصدیق نہیں کی ہے۔ تاہم حکام اس پہلو پر تفتیش کر رہے ہیں۔

اسی سے متعلق ای ٹی وی بھارت کے نمائندے نے دہلی کے سب سے بڑے ہسپتالوں میں شمار کیے جانے والے ایل این جے پی ہسپتال کے میڈیکل ڈائریکٹر سریش کمار سے خصوصی بات کی۔

انہوں نے بتایا کہ برڈ فلو سے بچنے کے لیے ضروری ہے کہ فی الحال مرغا کھانے سے پرہیز کیا جائے۔

ڈاکٹر سریش کمار نے کہا کہ حالانکہ ابھی تک دہلی میں برڈ فلو کا کوئی بھی معاملہ سامنے نہیں آیا ہے لیکن احتیاط کرنا ضروری ہے۔

انہوں نے بازار میں فروخت ہونے والے چکن تکا اور چکن فرائی کو نہ کھانے کی صلاح دی۔