نقاب کشائی کی اس تقریب سے قبل جے این یو کی طلبأ تنظیم کی جانب سے ایک پرچہ جاری کیا گیا ہے اوراس پرچے میں وزیر تعلیم جواب دو، مودی گو بیک سمیت مرکزی حکومت کی پالیسیوں پر نکتہ چینی کی گئی ہے۔
اس پورے معاملے میں طلبأ تنظیم کی جانب سے آج شام کو یونیورسٹی کے نارتھ گیٹ کے سامنے مظاہرہ کیا جانے والا ہے، اس کے علاوہ طلبأ تنظیم نے وزیراعظم نریندر مودی کو ایک کھلا خط لکھا ہے جس میں جے این یو کے لاپتہ طالب علم نجیب احمد اور روہت ویمولا کی موت سمیت یونیورسٹی کے طلبأ کی پریشانیوں کا ذکر کیا گیا ہے۔
اس کھلے خط میں یونیورسٹی کے موجودہ وائس چانسلر جگدیش کمار کے طلبأ کے حق میں صحیح کام نہ کرنے کا بھی الزام عائد کیا گیا ہے کیونکہ انھوں نے ابھی تک طلبأ تنظیم کو تصدیق نامہ نہیں دیا ہے جو مکمل طور سے غلط ہے۔ساتھ ہی اس خط میں گجرات فسادات کا بھی تذکرہ کیا گیا ہے۔
خط میں یہ بھی کہا گیا ہے کہ وزیراعظم نریندر مودی اکثر اپنی ریلیوں میں بھارت کے پہلے وزیراعظم پنڈت جواہر لال نہرو پر طنز کستے ہیں اور وہ آج بھی انھیں کے نام سے منسوب یونیورسٹی کے طلبأ سے خطاب کرنے والے ہیں لیکن وہ اپنے دور اقتدار میں ایک بھی یونیورسٹی کھول نہیں سکے ہیں۔
واضح رہے کہ وزیراعظم نریندر جے این یو احاطے میں تعمیر سوامی وویکانند کے مجسمے کی آج شام 6:30 بجے بذریعہ ویڈیو کانفرنسنگ نقاب کشائی کریں گے۔
