دہلی: جامعہ ملیہ اسلامیہ کے پی ایچ ڈی کے اسکالر منا خالد کو کھیل کے میدان میں عمدہ کارکردگی کے لیے انھیں دہلی اسٹیٹ ایوارڈ سے سرفراز کیا گیا۔ قومی راجدھانی دہلی کے وزیر اعلی اروند کیجریوال نے انھیں یہ ایوارڈ دہلی کے شاہ آڈیٹوریم میں دیا۔ واضح رہے کہ یہ ایوارڈ ہر سال ایک مرد کھلاڑی اور ایک خاتون کھلاڑی کو ان کی عمدہ کارکردگی کے لیے دیا جاتا ہے۔منا خالد دہلی کے بیڈمنٹن کے واحد ایسے کھلاڑی ہیں جنھوں نے پیرا بیڈ منٹن میں دلی کے ساتھ ساتھ ملک کا نام بھی روشن کیا ہے۔
یہ بھی پڑھیں: NewsClick row سی بی آئی نے نیوز کلک کے خلاف ایف سی آر ایکٹ کی خلاف ورزی کا مقدمہ درج کیا
منا خالد کی اس کامیابی پر جامعہ ملیہ اسلامیہ کی شیخ الجامعہ، پروفیسر نجمہ اختر نے مبارک باد دی اور ان کے لیے بہتر مستقبل کے لیے نیک خواہشات کا اظہار کیا۔ منا خالد کا ہدف آئندہ ایشائی کھیلوں اور پیرا اولمپک میں شرکت کرنا اور ملک کا نام روشن کرنا ہے۔ سردست منا خالد شعبہ ہندی، جامعہ ملیہ اسلامیہ سے ہندی ادب میں پی ایچ ڈی کر رہے ہیں۔ اس سے پہلے انھوں نے گریجویشن اور پوسٹ گریجویشن بھی جامعہ ملیہ اسلامیہ سے ہی کیا تھا۔ واضح رہے کہ جامعہ ملیہ اسلامیہ کے سینکڑوں طلبا کو مختلف شعبہ جات میں نمایاں خدمات کےلئے مختلف ایوارڈز سے نوازا جاچکا ہے۔
