جامعہ فائرنگ: ملزم کو جوینائل کورٹ میں پیش کیا جائے گا

گزشتہ روز جامعہ ملیہ اسلامیہ کے قریب مظاہرین کے ایک گروپ پر ایک نوجوان نے فائرنگ کی تھی، جس سے جامعہ کا ایک طالب علم زخمی ہو گیا تھا۔

دہلی پولیس کرائم برانچ اس ملزم کو جوینائل جسٹس بورڈ کے سامنے آج پیش کرے گی، دراصل گزشتہ روز جامعہ کے سامنے سی اے اے کے خلاف ایک احتجاجی مظاہرہ ہو رہا تھا، اس مظاہرے میں ایک نامعلوم شخص نے گولی چلائی، جس سے ایک طالب علم زخمی ہو گیا تھا۔

حملہ کے بعد پولیس نے حملہ کرنے والے کو گرفتار کر لیا اور زخمی طالب علم کو ایمس ٹراما سینٹر میں لے جایا گیا، جہاں اس کا علاج کرنے کے بعد ڈسچارج کر دیا گیا۔

اس پورے واقعے کے بعد علاقے میں خوف و ہراس پیدا ہو گیا، ذرائع ابلاغ کے نمائندوں نے حملہ آور کو اپنے کیمرے میں قید بھی کیا، وہ ہلکے رنگ کی پتلون اور سیاہ جیکٹ پہنے ہوئے تھا، پولیس نے اسے گرفتار کیا اور بعد میں ایک بیان جاری کیا کہ وہ نابالغ ہے۔

اسپیشل سی پی انٹیلیجنس پروین رنجن نے بتایا کہ 'جب تک مظاہرین کو خبر ہوتی، اس سے پہلے ہی حملہ آور نے گولی چلا دی، پولیس تفتیش کر رہی ہے اور اس کیس کو کرائم برانچ کو سونپ دیا گیا ہے'۔

جوائنٹ کمشنر آف پولیس دیویش شریواستو نے بتایا کہ 'پولیس نے حملہ آور کے خلاف آرمز ایکٹ کے تحت کیس درج کیا ہے اور تفتیش جاری ہے'۔