وزیر خارجہ جے شنکر کی چینی ہم منصب سے ٹیلیفونک بات چیت

مشرقی لداخ کے علاقے پینگونگ لیک میں واقع ایکچوول کنٹرول لائن (ایل اے سی) پر ہندوستانی اور چینی افواج کے انخلا پر اطمینان کا اظہار کرتے ہوئے ہندوستان نے چین سے ایل اے سی سے بقیہ فوج کی جلد واپسی پر زور دیا اور کہا کہ سرحد پر امن و استحکام کی بحالی کے بعد ہی دونوں ممالک کے باہمی تعلقات میں بہتری آئے گی۔

وزیر خارجہ ایس۔ جئے شنکر نے چینی وزیر خارجہ وانگ یی سے 75 منٹ یعنی تقریباً سوا گھنٹے تک ٹیلیفون پر بات چیت کی۔ اس دوران سرحدی صورتحال کے ساتھ ساتھ ہند-چین دوطرفہ تعلقات کا جائزہ لیا۔ دونوں فریق نے ایل اے سی پر جلد سے جلد معمول کے حالات بحال کرنے پر زور دیا۔ دونوں وزراء خارجہ نے رابطے میں رہنے اور ہاٹ لائن قائم کرنے پر بھی اتفاق کیا۔

وزارت خارجہ نے جمعہ کو ایک بیان میں تفصیلات بتاتے ہوئے کہا کہ گفت و شنید میں ڈاکٹر جے شنکر نے ستمبر 2020 میں ماسکو میں چینی وزیر خارجہ کے ساتھ میٹنگ کی یاد دلائی جس میں ہندوستان نے یکطرفہ طور پر چینی فریق کے اشتعال انگیزی اور یکطرفہ کارروائیوں پر تشویش ظاہر کی تھی۔

-یواین آئی