پاکستان کے شہر پشاور میں واقع شیعہ جامع مسجد میں دہشت گردانہ حملہ میں شہید ہوئے لوگوں کی یاد میں آج آل انڈیا شیعہ کونسل، باب العلم ایجوکیشنل سوسائٹی اور اہل بیت کونسل انڈیا کے زیر اہتمام ایک تعزیتی جلسہ اور مجلس عزا کا انعقاد کیا گیا جس میں مقررین نے نمازیوں پر کیے گئے وحشیانہ خود کش حملہ کی شدید مذمت کی۔
اس موقع پر آل انڈیا شیعہ کونسل کے صدر مولانا جنان اصغر مولائی نے مجلس کو خطاب کرتے ہوئے کہا کہ پاکستان میں اہل بیت کا قتل دہشت گردوں کے ہاتھوں مسلسل جاری ہے۔ پاکستان میں جنگل راج نافذ ہے۔ دشمن، محافظ اسلام مکتب تشیع کے حوصلہ کو توڑنا چاہتا ہے مگر شہادتیں اس مکتب کو مزید ہمت اور عزم و حوصلہ عطا کرتی ہیں اور ملت شیعہ ہمیشہ ظالموں کے سامنے دیوار کی مانند کھڑی رہی ہے اور یوں ہی کھڑی رہے گی۔
جلسہ کو خطاب کرتے ہوئے آل انڈیا امام کونسل کے صدر مولانا مقصود الحسن قاسمی نے اس حملے کی شدید مذمت کی اور کہا کہ حکومت پاکستان اس حملہ کی ذمہ دار ہے، کھل کر نہ سہی خفیہ طور پر پاکستانی گورنمنٹ اس قسم کے دہشت گردوں کی حمایت کرتی ہے۔ ہم سمجھتے تھے کہ پاکستان میں عمران خان کی حکومت آنے کے بعد وہاں دہشت گردوں پر لگام لگے گی لیکن ایسا نہیں ہوا بلکہ ان واقعات کا ہونا یہ بتا رہا ہے کہ عمران خان کی حکومت بھی پس پردہ دہشت گردی کی حمایت کر رہی ہے۔
مولانا سید مہدی زیدی بجنوری نے کہا کہ 'جس امت کو خدا وند عالم نے بہترین امت قرار دیا ہو اس امت میں اس طرح کے وحشیانہ واقعات کا پیش آنا در حقیقت پیغمبر اسلام کی سیرت سے دوری کا نتیجہ ہے اس طرح کے واقعات کے پیچھے یزیدی فکر کار فرما ہیں۔
آل انڈیا شیعہ کونسل کے ترجمان اور اہل بیت کونسل انڈیا کے جنرل سکریٹری مولانا جلال حیدر نقوی نے پشاور میں شہید ہونے والے مومنین کے اہل خانہ کے ساتھ اظہار ہمدردی کرتے ہوئے کہا کہ پاکستان میں دہشت گردی کا خاتمہ ہونا چاہیے کوئی بھی حکومت ظلم کے ساتھ باقی نہیں رہ سکتی۔
اس موقع پر باب العلم ایجوکیشنل سوسائٹی کے سکریٹری سید فرخ زیدی نے شرکاء کا شکریہ ادا کیا۔ جلسہ کا آغاز مولانا مشکور حسین نے تلاوت کلام پاک سے کیا اور مرثیہ خوانی کے فرائض ذیشان زیدی نے ادا کئے کثیر تعداد میں شریک مومنین نے پشاور کے شہدا کے لئے فاتحہ خوانی اور دعائے مغفرت کی۔
