دارالحکومت دہلی کے شمال مغربی دہلی کے آدرش نگر علاقے میں بدھ کی شب ایک 18 سالہ لڑکے کا پیٹ پیٹ کر قتل کردیا گیا اس واقعے کے بعد علاقہ کا ماحول کشیدہ ہو گیا حالات کی نزاکت کو دیکھتے ہوئے علاقے میں پولیس کو تعینات کردیا گیا ہے۔
پوسٹ مارٹم کی رپورٹس کے مطابق تلی پھٹنے سے نوجوان کی موت ہوئی ہے۔ 18 سالہ راہل راجپوت کو بدھ کی شب میں پیٹ پیٹ کر ادھمرا کر دیا گیا تھا جب اسے ہسپتال لے جایا گیا تو علاج کے دوران نوجوان نے دم توڑ دیا۔
شروعاتی جانچ میں راہل کا ایک لڑکی سے دوستی کی وجہ سے مارپیٹ کرنے کی بات سامنے آئی ہے۔ اس معاملہ میں تین نابالغ سمیت 5 لوگوں کو گرفتار کیا گیا ہے۔
شمال مغربی دہلی کی ڈی سی پی ویجینتا آریہ کے مطابق راہل کا ایک مسلم لڑکی سے دوستانہ تعلقات تھے جو لڑکی کے اہل خانہ کو پسند نہیں تھے اسی لیے لڑکی کے بھائی محمد راج، رشتہ دار منور حسین سمیت 5 لوگوں نے راہل کے ساتھ مار پیٹ کی۔
تاہم پولیس نے کارروائی کرتے ہوئے تمام ملزمان کو گرفتار کر لیا ہے۔ انہوں نے مزید کہا کہ یہ دو خاندانوں کے درمیان کا مسئلہ ہے اسی لیے میں میڈیا سے اپیل کرتی ہوں کہ اسے مذہبی رنگ نہ دیا جائے۔
پولیس کے مطابق راہل راجپوت اپنے اہل خانہ کے ساتھ مولچند کالونی میں رہتے تھے۔ راہل دہلی یونیورسٹی کا طالب علم تھا اور ساتھ ہی انگریزی کی ٹیوشن بھی پڑھاتا تھا جب راہل کے ساتھ مار پیٹ کی بات کا پتہ چلا تو اسے بابو جگجیون رام ہسپتال میں لے جایا گیا جہاں علاج کے دوران راہل نے دم توڑ دیا۔
