راجیہ سبھا میں حکومت نے تاناشاہی انداز میں بل پاس کرایا: ناصر حسین

دارالحکومت دہلی میں گذشتہ دنوں سے زرعی بل کے خلاف مسلسل مظاہرے ہوئے۔ ایوان سے لیکر سڑکوں تک اس کی گونج سنائی دی، تاہم تمام اعتراضات اور احتجاج کے باوجود اسے پاس کرا لیا گیا۔ اس دوران ایوان کے آٹھ ارکان کو بھی معطل کیا گیا، جس کے بعد راجیہ سبھا کے باہر ہی حزب اختلاف کی جماعتوں نے اپنا احتجاج جاری رکھا۔ ان آٹھ اراکین پارلیمان میں شامل کرناٹک سے کانگریس کے راجیہ سبھا کے رکن سید ناصر حسین سے ای ٹی وی بھارت کے نمائندے سے خصوصی بات چیت کی۔

اس بات چیت میں راجیہ سبھا کے رکن سید ناصر حسین نے بتایا کہ، 'رزعی بل کو تاناشاہی طریقہ سے پاس کرایا گیا، جب اس کے خلاف حزب اختلاف کی سیاسی جماعتوں نے اعتراض کیا تو انہیں مارشل کی مدد سے باہر نکال دیا گیا۔'

انہوں نے بتایا کہ، 'ہماری مانگ تھی کہ ووٹنگ کرائی جائے، لیکن ایوان میں ووٹنگ کرائے بغیر ہی اس بل کو پاس کر دیا گیا جو کہ ایوان کے قوانین اور ضوابط کی خلاف ورزی تھی۔ اتنا ہی نہیں اس کے بعد حزب اختلاف کے لیڈران کے خلاف بھی بدتمیزی کی گئی، جس سے ایوان کا ماحول خراب ہوا۔'

سید ناصر حسین نے بتایا کہ، '20 سیاسی جماعتیں اس بل کی مخالفت کر رہی تھی۔ اس کا مطلب صاف تھا کہ یہ بل ووٹنگ میں پاس نہیں ہو سکتا تھا، اس لیے اس پر ووٹنگ کرائے بغیر ہی پاس کیا جانا تھا اور وہی انہوں نے کیا۔'