کانگریس کے قومی ترجمان میم افضل نے ای ٹی وی بھارت سے بات کرتے ہوئے کہا کہ حکومت واضح کرے کے ملک میں این آر سی نافذ کیا جائے گا یا نہیں ۔
کانگریسی ترجمان نے کہا کہ حکومت کی جانب سے یہ کہنا کہ انہوں نے این آر سی نافذ کرنے کا کوئی منصوبہ تیار نہیں کیا ہے یا اس پر غور نہیں کیا ہے، حکومت کا یہ جواب سمجھ سے بالاتر ہے۔
میم افضل نے مزید کہا کہ اس حکومت پر اعتماد کرنا ناممکن ہے، یہ جھوٹ بولنے اور اپنا موقف بدلنے میں ماہر ہے۔ یہ کل کیا کریں گے اس کے بارے میں کچھ کہہ نہیں سکتے۔اس حکومت کو پارلیمنٹ میں وضاحت کرنا چاہئے کہ اب این آر سی پر کوئی بات نہیں ہوگی۔
ای ٹی وی بھارت کے ذریعہ پوچھے گئے سوال پر کہ شہریت ترمیمی قانون کے خلاف شاہین باغ میں جاری مظاہرے کو بی جے پی کے ذریعہ بدنام کرنے کی کوششوں کے درمیان کانگریس شاہین باغ کے ساتھ کھڑے ہونے سے گریز کیوں کررہی ہے، اس کے جواب میں میم افضل نے کہا کہ ہم شاہین باغ کے ساتھ کھڑے ہیں یا نہیں یہ الگ بات ہے لیکن ہم خود اس قانون کے خلاف احتجاج کررہے ہیں۔
میم افضل سے سوال کیا گیا کہ وزیراعظم نریندر مودی نے دہلی اسمبلی انتخابی مہم کے دوران شاہین باغ اور سلیم پور کے مظاہرین کا ذکر کیا اور ان مظاہروں کو ملک کو توڑنے کی سازش قرار دی، اس پر میم افضل نے کہا کہ گزشتہ کئی دنوں سے ہم دیکھ رہے ہیں کہ دہلی میں پولرائزیشن کی کوشش کی جارہی ہے۔ جس میں خود وزیر اعظم شامل ہیں اور یہ افسوسناک بات ہے۔"
میم افضل نے مزید کہا کہ بی جے پی شاہین باغ کے نام پر عوام کو پولرائز کر لے لیکن انہیں اس سے کوئی انتخابی فائدہ حاصل نہیں ہوگا۔
