رام ویر سنگھ بدھوڑی نے کہا ہے کہ دہلی کے بازار کھل گئے، ہفتہ واری بازاروں پر لگی پابندی بھی ہٹالی گئی اور دہلی میٹرو کے آپریشن کی اجازت بھی دے دی گئی ہے۔ ایسے میں یہاں کے جمز کو کھولنے پر لگی پابندی بھی ہٹالینی چاہیے۔
لیفٹیننٹ گورنر انل بیجل کو آج لکھے مکتوب میں مسٹر بدھوڑی نے کہا کہ جم قوت مدافعت کی صلاحیت کوبڑھانے میں مددگار ہے۔ انہوں نے کہا کہ دارالحکومت کے لوگوں کی جانب سے ان جمز کو کھولنے کا مطالبہ مسلسل کیا جارہا ہے۔
اس سلسلے میں کئی لوگوں نے مجھ سے بھی رابطہ کر کے یہ درخواست کی ہے کہ ان کے مطالبے سے آپ کو آگاہ کیا جائے۔ انہوں نے کہا کہ جم چلانے والوں کا بھی یہ کہنا ہے کہ ان کے جمز میں ایئر کنڈیشن اور ہوا کے وینٹیلیشن کا پختہ انتظام کیا گیا ہے اور ماسک، سینیٹائزر، دستانے وغیرہ کا بھی انتظام کیا گیا ہے۔
اپوزیشن رہنماء نے مسٹر بیجل سے دارالحکومت کے جموں کو کھولنے کی درخواست کرتے ہوئے کہا کہ حکومت ان جموں کو کھولنے کا وقت اور یہاں آنے والوں کی تعداد متعین کرسکتی ہے۔
