دہلی: دارالحکومت دہلی کے کانسٹی ٹیوشن کلب آف انڈیا میں فلسطینی عوام کے ساتھ اظہار یکجہتی کے لیے بھارت فلسطین فرینڈشپ فورم کے بینر تلے ایک کانفرنس کا انعقاد کیا گیا جس میں عرب ممالک کے تمام سفیروں نے شرکت کی اور فلسطینی عوام کے ساتھ کھڑے ہونے کا عزم کیا۔ اس تقریب میں آر جے ڈی کے ممبر آف پارلیمنٹ منوج کمار جھا نے اپنے خیالات کا اظہار کرتے ہوئے کہا کہ فلسطینی عوام کے لیے بھارت ایک دوست ملک ہے حکومت چاہے فلسطین کی بجائے آج اسرائیل کے ساتھ تعلقات قائم کرنے میں مصروف ہے لیکن بھارتی عوام ہمیشہ فلسطینیوں کے ساتھ کھڑی ہے۔ انہوں نے کہا کہ آج فلسطین مختلف محاذ پر اکیلے لڑھ رہا ہے ہمیں صرف 15 مئی کو ہی فلسطینی عوام کے ساتھ اظہار یکجہتی کرنے کی ضرورت نہیں ہے بلکہ ہمیں روزانہ فلسطینی عوام کو یہ بتانے کی ضرورت ہے کہ اس ظلم و جبر کی لڑائی میں ہم ان کے ساتھ ہیں۔ پروفیسر اپوروانند نے اپنے خطاب میں کہا کہ تاریخ یہ بتاتی ہے کہ ایک وقت تھا جب تمام عرب ممالک فسلطینی عوام کے ساتھ تھے لیکن موجودہ دور میں عرب ممالک بھی اسرائیل حکومت کے ساتھ اپنے رشتہ استوار کرنے میں مصروف ہو چکے ہیں۔ اب فلسطینی عوام کو نہیں معلوم کہ وہ کس طرح اس لڑائی کو لڑیں۔ ان کا کہنا تھا کہ جس طرح سے آج تمام ممالک یوکرین کے ساتھ اس جنگ میں ساتھ دے رہے ہیں اور اسے اکیلا نہیں چھوڑ رہے فلسطینی عوام کو بھی اسی ساتھ کی ضرورت ہے۔
![فلسطین کے ساتھ اظہار یکجہتی کے لیے تقریب کا انعقاد](https://etvbharatimages.akamaized.net/etvbharat/prod-images/dl-nd-02-rememberingnaqbadayon75years-avb-7200880_15052023203701_1505f_1684163221_1005.jpg)