کورونا وائیر ڈاکٹر انس مجاہد کے والد کو کیجریوال نے ایک کروڑ کا چیک دیا

اروند کجریوال نے کہا کہ وہ ڈاکٹر انس اور دیگر لوگوں کے شکرگزار ہیں جو وبا کے وقت لوگوں کی جانیں بچانے کے لیے اپنی خدمات انجام دے رہے ہیں۔

دہلی کے کورونا وارئیر ڈاکٹر انس مجاہد کے والد کو آج دہلی کے وزیراعلیٰ اروند کیجریوال نے ایک کروڑ روپے کا چیک پیش کیا۔ دہلی کے 26 سالہ ڈاکٹر انس مجاہد کے والد نے کیجریوال سے چیک وصول کرنے کے بعد کہا کہ ان کا بیٹا جب اپنے فرائض سرانجام دے رہا تھا تبھی وہ کورونا وائرس کی زد میں آگیا اور اس دوران اس کی موت ہوگئی۔


ایک کروڑ کا معاوضہ حاصل کرنے کے بعد صحافیوں سے گفتگو کرتے ہوئے ڈاکٹر انس مجاہد کے والد نے کہا کہ انہیں امید ہے کہ ان کے دوسرے بچے بھی ملک کی خدمت کریں گے۔

وزیراعلی اروند کیجریوال نے صحافیوں سے بات کرتے ہوئے کہا کہ، "ڈاکٹر انس تب سے جی ٹی بی اسپتال میں مریضوں کا علاج کر رہے تھے جب سے دہلی میں کورونا نے اپنے پیر پسارے تھے۔ انہیں 9 مئی کو مریضوں کے علاج کے دوران کورونا سے انفیکٹڈ ہونے کا پتہ چلا جس کے کچھ دیر بعد ہی ڈاکٹر انس کا انتقال ہوگیا۔

کجریوال نے کہا کہ وہ ڈاکٹر انس اور دیگر لوگوں کے شکرگزار ہیں جو وبائی مرض کے وقت لوگوں کی جانیں بچانے کے لیے اپنی خدمات انجام دے رہے ہیں۔ انہوں نے مزید کہا ، "میں ڈاکٹر انس کے والد سے بات کر رہا تھا، جو خود ایک ڈاکٹر ہیں۔ جب میں نے ان سے کہا کہ کسی بھی چیز کی ضرورت ہو تو مجھ سے رابطہ کر سکتے ہیں۔

جس کے جواب میں ڈاکٹر مجاہد الاسلام نے کہا ‘مجھے حکومت کی طرف سے کسی چیز کی ضرورت نہیں ہے۔ مجھے امید ہے کہ میں اور میری اولادیں ملک کی خدمت کریں گی۔ یہ بات ایک باپ نے اپنے 26 سالہ بیٹے کو کھونے کے بمشکل 10 دن بعد مجھ سے کہی۔

ڈاکٹر مجاہد نے کہا کہ انہوں نے اپنے بیٹے کو ڈاکٹر بنایا ہی اس لیے تھا کہ وہ ایک دن ملک کی خدمت کرے گا۔