قومی دارالحکومت دہلی اپنے لذیذ پکوان اور چٹپٹے ذائقوں کے لیے دنیا بھر میں مشہور ہے، ایسے میں اس فوڈ فیسٹیول کا آغاز یوم عشاق یعنی 14 فروری کو ہوا، اور اس وقت سے ہی لذیذ کھانوں کے شوقین قرب و جوار سے پرانی دہلی کی تہذیب میں ڈوبے اس جشن سے محظوظ ہورہے ہیں، تاہم یہ فیسٹیول 29 فروری تک جاری رہے گا۔
دارالحکومت دہلی کے کراؤن پلازہ ہوٹل میں دہلی کے چھ منتخب اور لذیذ قسم کے پکوانوں کو عوام کے سامنے پیش کیا گیا اور پرانی دہلی کی تہذیب کو دور جدید کے لباس سے مزین کیا گیا۔
اس جشن میں چکن چنگیزی، گوشت کا حلوہ، بٹیر کا سالن، اکبری مرغ مصالحہ، جہانگیری مٹن قورمہ جیسے لذیذ کھانے عوام کی توجہ کا مرکز بنے ہوئے ہیں۔
کھانے کے شوقین افراد کے لیے محبت کا شربت بطورِ مقابلہ بھی رکھا گیا ہے جسے جیتنے والے شخص کو ایک برس تک رات میں مفت کھانے کے لیے انعام دیا جائے گا۔
اس جشن کی سب سے خاص بات پرانی دہلی کی تھیم ہے جسے کراؤن پلازہ ہوٹل کے ایڈیسیہ نے ایک منفرد انداز میں پیش کیا ہے۔
یہاں آپ پرانی دلی کے ان تمام پکوانوں سے لطف اندوز ہوسکتے ہیں جو آپ نے کبھی بھی پرانی دہلی میں رہتے ہوئے نوش فرمائیں ہوں گے۔
یہاں مرزا غالب کی حویلی، پرانی دلّی کا چور بازار، فتح پوری کے مٹھائیاں، چاوڑی بازار کی چاٹ، اور سیتا رام بازار کی دولت کی چاٹ کو دلکش انداز میں پیش کیا گیا ہے۔
پرانی دہلی کے اس جشن میں عماوسیہ کی رات والی دال، پنیر خونی مصالحہ، ویرانہ کٹلیٹ، چٹپٹی چڑیل، ڈائن کا تڑکا، تانترک بھسم کا لڈو، حبشی حلوہ، کراچی حلوہ، فروٹ کلفی، دولت کی چاٹ، فتح پوری کی لچھا ربڑی، سنہرے پپیتے کا حلوہ، حنیف کے فرنی اور شفیق کی کھیر کے ساتھ ساتھ دیگر اقسام کے لذیذ پکوان بھی اس جشن میں شائقین کی توجہ کا مرکز بنے ہوئے ہیں۔