نئی دہلی: ہائی کورٹ نے منی لانڈرنگ کیس میں دہلی حکومت کے سابق وزیر ستیندر جین کی طرف سے دائر ضمانت کی درخواست پر اپنا فیصلہ محفوظ کر لیا ہے۔ انفورسمنٹ ڈائریکٹوریٹ (ای ڈی) نے جین کو گذشتہ سال 30 مئی کو منی لانڈرنگ میں ملوث چار دیگر ملزمان کے ساتھ مبینہ روابط رکھنے کے الزام میں گرفتار کیا تھا جس کی وجہ سے عآپ لیڈر اس وقت تہاڑ جیل میں بند ہیں۔
جسٹس دنیش کمار شرما نے ای ڈی اور عام آدمی لیڈر کی طرف سے پیش ہونے والے وکلا کے دلائل سنے اور پھر فیصلہ محفوظ کر لیا۔ جین نے اپنی ضمانت کی درخواست میں کہا کہ ان کے خلاف کوئی مقدمہ نہیں ہے اور وہ جانچ میں تعاون کرنے کے لیے سات بار ای ڈی کے سامنے پیش ہو چکے ہیں۔ ساتھ ہی انہوں نے کہا کہ انہیں قید میں رکھنے کی ضرورت نہیں ہے، کیونکہ کیس میں چارج شیٹ داخل کی جاچکی ہے۔
یہ بھی پڑھیں: Money Laundering Case عدالت نے ستیندر جین کو جواب داخل کرنے کا وقت دیا
واضح رہے کہ گزشتہ سال 17 نومبر کو عآپ لیڈر نے ضمانت کی درخواست خارج کرنے کے ٹرائل کورٹ کے فیصلے کو چیلنج کیا تھا۔ ٹرائل کورٹ نے ستیندر جین کے جرم میں ملوث ہونے کے اشارے کی بنیاد پر ضمانت دینے سے انکار کر دیا۔ شریک ملزم ویبھو جین اور انکت جین کی ضمانت کی درخواست بھی ٹرائل کورٹ نے مسترد کر دی تھی۔ عدالت نے کہا کہ جین نے جان بوجھ کر جرم کو چھپایا اور ایسا لگتا ہے کہ وہ منی لانڈرنگ کیس میں پہلا مجرم ہیں۔ ہائی کورٹ نے ویبھو جین اور انکش جین کی درخواست ضمانت پر بھی اپنا فیصلہ محفوظ رکھا ہے۔ عدالت میں ای ڈی نے تینوں کی ضمانت کی مخالفت کیا تھا۔
