ملک گیر سطح پر کورونا کیسز میں مسلسل بے تحاشہ اضافہ کو دیکھتے ہوئے درگاہ حضرت نظام الدین اولیاءؒ کو بند کرنے کا انتظامی کمیٹی نے فیصلہ کیا ہے۔ درگاہ انتظامی کمیٹی کے جنرل سکریٹری سید کاشف علی نظامی نے ای ٹی وی بھارت سے بات کرتے ہوئے بتایا کہ دہلی میں کورونا وائرس کے بڑھتے کیسز کو دیکھتے ہوئے کمیٹی نے 30 اپریل تک درگاہ کو زائرین کے لیے بند کرنے کا فیصلہ کیا ہے۔
انہوں نے کہا کہ چند افراد کے علاوہ درگاہ حضرت نظام الدین میں کسی کو داخلہ کی اجازت نہیں ہے۔ البتہ درگاہ کی جانب سے غربا و مساکین کے درمیان لنگر اور افطار کے پیکٹ تیار کر کے درگاہ کے باہر ہی تقسیم کیے جائیں گے۔
قابل ذکر ہے کہ گذشتہ برس بھی درگاہ حضرت نظام الدین اولیاء تقریباً ساڑھے 5 ماہ تک بند رہی تھی، اس کے بعد جب درگاہ کو زائرین کے لیے کھولا گیا تو اس وقت بھی رہنما ہدایات پر عمل کرتے ہوئے ہی زیارت کرنے کی اجازت دی گئی تھی۔
