آل انڈیا کانگریس کمیٹی کے شعبہ اقلیتی امور نے فیصلہ کیا ہے کہ اقلیتی فلاح و بہبود سے متعلق منصوبوں سے اقلیتوں کو آگاہ کرانے اور فوائد حاصل کرنے کی ترغیب دینے کے لئے ملک گیر سطح پر مہم چلائے گی۔ یہ فیصلہ تمام ریاستوں کے اقلیتی شعبے کے چیرمنیوں کے ساتھ طویل میٹنگ میں کیا گیا.
آل انڈیا نیشنل کانگریس کمیٹی کے اقلیتی امور کے قومی چیئرمین عمران پرتاپ گڑھی کی صدارت تمام ریاستوں کے چیئرمینوں کے ساتھ میراتھن میٹنگ کا انعقاد کیا گیا اور اس سلسلے میں سنجیدگی سے غور و خوض کیا گیا۔
اس میٹنگ میں ملک کی اقلیتوں کو کانگریس کے ساتھ دوبارہ کس طرح سے جوڑا جائے اور ان کے مسائل کے بارے میں بات کی جائے۔ اس کے علاوہ اس میٹنگ میں پورے ملک کی اقلیتی برادری کے سیاسی اور سماجی مسائل سے آگاہ ہونے کے بعد عمران پرتاپ گڑھی نے مسائل کے حل کے لئے ہر ممکن کوشش کرنے کا یقین دلایا اور کہا کہ ہم ان تک پہنچنے کی پوری کوشش کریں گے۔
میٹنگ میں بہار کانگریس اقلیتی امور کے نائب صدر اور تنظیمی انچارج شبلی منظور نے تجویز پیش کی کہ اقلیتی بہبود کی اسکیمز سے اقلیتی برادری کو زیادہ سے زیادہ فوائد پہنچانے کے لئے شعبہ اقلیتی امور قومی سطح پر ایک مہم چلائے۔ اس مہم کے تحت، بلاک سطح کے کانگریس کارکنوں کو اقلیتی بہبود کے لئے مرکزی اور ریاستی حکومت کی اسکیموں کے بارے میں مکمل معلومات فراہم کی جانی چاہئے، کس اسکیم سے کس طرح فوائد حاصل کیے جاسکتے ہیں، جب اس کا اطلاق ہوگا اور کس افسر یا دفتر سے اس اسکیم پر عمل درآمد ہوتا ہے وغیرہ کے بارے میں معلومات فراہم کی جائے گی۔ یہ بلاک سطح کے کارکنان زیادہ سے زیادہ لوگوں کو ان اسکیموں سے فائدہ اٹھانے اور ان کی مدد کے لئے ترغیب دیں گے۔
مزید پڑھیں:
اس کے علاوہ انہوں نے کہا کہ ایک پریشر گروپ بھی تشکیل دیا جانا چاہئے، جو متعلقہ افسر اور آفس سے مستقل رابطے میں رہتے ہوئے، اسکیموں کی درخواستوں پر فوری اور منصفانہ کارروائی کرے اور اس کی نگرانی کرے۔
اس تجویز کو منظور کرتے ہوئے، عمران پرتاپ گڑھی نے کہا کہ اس سے اقلیتی برادری کی فلاح و بہبود میں ہماری شراکت کو یقینی بنایا جائے گا۔ اور تمام ریاستوں کے چیئرمینوں کو ہدایت کی کہ وہ اپنی اپنی ریاستوں میں اس طرح کی مہم چلائیں۔ انہوں نے یہ بھی کہا کہ اس مہم پر عمل درآمد اور نگرانی خود قومی ایگزیکٹو ہی کرے گی۔
