اتر پردیش میں آئندہ برس 2022میں ہونے والے اسمبلی انتخاب کو لے کر سے کانگریس سرگرم ہے۔ اس سلسلے میں کانگریس نے جمعہ کو یو پی انتخاب کے لیے انتخابی مہم کمیٹی سمیت پانچ اہم کمیٹیاں تشکیل دیں ہیں۔ اس کمیٹی میں کانگریس کے سینئر لیڈر پی ایل پونیا کو بڑی ذمہ داری دیتے ہوئے یو پی انتخابی مہم کمیٹی کا سربراہ بنایاگیا ہے جبکہ سابق مرکزی وزیر سلمان خورشید پر بھروسہ ظاہر کرتے ہوئے انھیں منشور کمیٹی کی ذمہ داری سونپی گئی ہے۔
اس کے علاوہ کانگریس نے سینئر لیڈروں راجیو شکلا، بیگم نور بانو، ظفر علی نقوی کو انتخاب کو آرڈنیشن کمیٹی، آرادھنا مشرا، وویک بنسل کو منشور کمیٹی میں شامل کیا ہے۔ ان کے علاوہ یو پی انتخاب کے لیے بنی دیگر کمیٹیوں میں کانگریس کے ریاستی سطح کے لیڈروں کےساتھ ہی کئی مرکزی لیڈروں کو بھی جگہ دی گئی ہے۔
- مزید پڑھیں: اتر پردیش میں لوگوں نے تبدیلی کا من بنالیا ہے: پرینکا گاندھی
- اترپردیش میں کانگریس واحد متبادل: کانگریس لیڈر
پارٹی نے ریاستی کانگریس کمیٹی میں کئی نئے عہدیداروں کو بھی شامل کیا ہے۔ ان میں اوپیندر سنگھ، مقصود خان اور جیونت سنگھ کو ریاستی کانگریس کمیٹی کا نائب سربراہ مقرر کیا گیا ہے۔ علاوہ ازیں دنیش کمار سنگھ کو تنظیمی جنرل سکریٹری بنایا گیا ہے۔ ان کے علاوہ 12 جنرل سکریٹری اور 31 سکریٹری کی بھی تقرری ہوئی ہے۔
