افغانستان کے قندھار میں وائٹرز کے فوٹو جرنلسٹ دانش صدیقی کی ہلاکت پر خاموش رہنے پر بھارتیہ جنتا پارٹی پر سخت تنقید کرتے ہوئے پی چدمبرم نے کہا کہ صدیقی کی موت اور بڑھتی ہوئی افراظ زر، دو ایسے موضوعات ہیں جس پر بی جے پی۔این ڈی اے کی جانب سے تبصرہ نہیں کیا جاسکتا۔
پی چدمبرم نے ٹوئٹ کیا کہ ’دانش صدیقی کی المناک موت اور بڑھتی ہوئی افراط زر، دو ایسے موضوعات ہیں جن پر بی جے پی۔این ڈی اے کوئی تبصرہ نہیں کریں گے کیونکہ یہ دونوں موضوع ان کی غلط بیانی جس سلامتی، ترقی اور فلاح کی باتیں کی جاتی ہیں، پر فٹ نہیں بیٹھتے۔
واضح رہے کہ دہلی فسادات، ملک میں کورونا بحران، لاک ڈاؤن اور آکسیجن بحران پر دانش صدیقی کی کھینچی گئی تصاویر نے دنیا بھر میں سرخیاں بٹوری تھی۔ اس کے علاوہ جامعہ ملیہ اسلامیہ میں سی اے اے کے خلاف احتجاج کرنے والے طلبا پر تشدد، شمالی مشرق دہلی میں ہوئے فرقہ وارانہ فسادات اور کورونا کے دوران دانش صدیقی کی کھینچی ہوئی دردناک تصاویر وائرل ہونے کے بعد مختلف گوشوں سے حکومت پر تنقید کی گئی تھی۔
افغانستان کے کندھار میں طالبان اور افغان فوج کے درمیان جھڑپ کے دوران فوٹو جرنلسٹ دانش صدیقی ہلاک ہوگئے۔ دانش کی ہلاکت پر بھارت میں جہاں غم کی لہر ہے وہیں کچھ لوگ ان کی موت پر جشن منا رہے ہیں۔
تازہ اطلاعات کے مطابق بھارت کے سیکریٹری خارجہ ہرش وردھن شرنگلا نے اقوام متحدہ کی سلامتی کونسل میں خطاب کرتے ہوئے صدیقی کی ہلاکت کی مذمت کی اور مسلح تصادم کے دوران عام شہریوں پر تشدد پر تشویش کا اظہار کیا۔
یہ بھی پڑھیں: دانش صدیقی کی ہلاکت پر کہیں ماتم تو کہیں جشن؟
دانش کی موت پر عالمی رہنماؤں کے علاوہ کانگریس رہنما راہل گاندھی، مغربی بنگال کی وزیراعلیٰ ممتا بنرجی، کیرالا کے وزیر اعلیٰ پنارائی وجین و دیگر نے صدمہ کا اظہار کیا لیکن بی جے پی اور اس کی ہم خیال پارٹیوں کی جانب سے دانش صدیقی کی ہلاکت پر کوئی تبصرہ نہیں کیا گیا۔
