ملک میں جب سے انلاک-1 شروع ہوا ہے تب سے سڑکوں پر لوگوں کی نقل و حرکت میں اضافہ ہوا ہے۔ اسی طرح دہلی کی سڑکوں پر بھی نقل و حرکت میں اضافہ ہوا ہے۔ زیادہ تر لوگ ماسک پہن کر سڑکوں پر نکل رہے ہیں، لیکن بہت سے لوگ ایسے ہیں جو ماسک پہنے بغیر باہر نکل رہے ہیں۔ دہلی پولیس ایسے لوگوں کے خلاف مسلسل مہم چلا رہی ہے۔ دہلی پولیس نے اب تک 12 ہزار 188 افراد کے ماسک نہ پہننے اور سماجی دوری کی پیروی نہ کرنے کے چالان کاٹے ہیں۔
دہلی پولیس کے ایک سینئر عہدیدار نے بتایا کہ انلاک-1 میں دی گئی نرمی کے بعد جو لوگ قواعد پر عمل نہیں کرتے ہیں ان کے چالان کاٹے جا رہے ہیں۔ گذشتہ 24 گھنٹوں کے دوران دہلی کے مختلف علاقوں میں ایسے 813 افراد کے چالان کیے گئے۔
پولیس افسر نے کہا کہ ایک طرف دہلی پولیس ماسک نہ پہننے پر لوگوں کے چالان کاٹ رہی ہے۔ وہیں، دوسری طرف مستحق افراد میں ماسک بھی مسلسل بانٹے جا رہے ہیں۔ گذشتہ 24 گھنٹوں کے دوران دہلی کے مختلف علاقوں میں 1 ہزار 746 ضرورت مندوں میں ماسک تقسیم کیے گئے ہیں۔ افسر نے بتایا کہ گذشتہ 10 دنوں میں دہلی پولیس نے کل 39 ہزار 918 افراد میں ماسک تقسیم کیے ہیں۔
