شاہین باغ میں اے آئی ایم آئی ایم کی ممبر سازی مہم

قومی دارالحکومت دہلی کے مسلم علاقوں میں آل انڈیا مجلس اتحاد المسلمین (اے آئی ایم آئی ایم) کی ممبر سازی مہم زور و شور سے جاری ہے۔ مہاراشٹر اور بہار میں عوام کی ملی حمایت کے بعد آل انڈیا مجلس اتحاد المسلمین ملک بھر میں سرگرم ہوگئی ہے اور مسلم علاقوں میں زور و شور سے ممبر سازی مہم شروع کر رکھی ہے۔

جامعہ نگر کے شاہین باغ میں گزشتہ ایک ہفتہ سے اے آئی ایم آئی ایم کی خواتین کارکنان مختلف گلیوں میں کیمپ لگا کر لوگوں کو ممبر بنارہی ہیں۔

اس دوران لوگوں میں اے آئی ایم آئی ایم کے تئیں کافی دلچسپی دیکھنے کو ملی۔ کیمپ پر کثیر تعداد میں لوگوں کی بھیڑ دیکھی گئی۔

ممبر سازی مہم میں شامل افراد نے بتایا کہ بیرسٹر اسدالدین اویسی کی مسلم نمائندگی سے مسلمان کافی خوش ہیں، یہی وجہ ہے کہ قطار در قطار لوگ اے آئی ایم آئی ایم میں شامل ہورہے ہیں۔

انہوں نے کہا کہ جس گلی میں کیمپ لگاتے ہیں وہاں کے لوگوں سے پہلے اجازت لیتے ہیں پھر اس کے بعد بینر دیکھ کر خودہی لوگ کیمپ آتے ہیں اور ممبر سازی حاصل کرتے ہیں۔

واضح رہے کہ کچھ دن قبل ہی اے آئی ایم آئی ایم آئی ایم نے دہلی یونٹ کو مضبوط کرنے کے لیے بزنس مین معروف شخصیت کلیم الحفیظ کو صدر بنایا ہے جس کے بعد پارٹی فعال ہوگئی ہے۔

گزشتہ دنوں کلیم الحفیظ نے پارٹی کے رکن پارلیمان امتیاز جلیل سے ملاقات کی اور آئندہ سال ہونے والے میونسپل کارپوریشن انتخابات پر تبادلہ خیال کیا۔