ئی دہلی: دہلی کے وزیر صحت راج کمار آنند نے منگل کو کہا کہ قومی دارالحکومت میں عام آدمی پارٹی (اے اے پی) کی حکومت تمام شہریوں کو صحت کی معیاری سہولیات فراہم کرنے اور صحت عامہ کے بنیادی ڈھانچے کو مضبوط بنانے کے لیے جنگی بنیادوں پر کام کر رہی ہے۔ آنند دلشاد گارڈن میں واقع دہلی اسٹیٹ کینسر انسٹی ٹیوٹ اور انسٹی ٹیوٹ آف ہیومن بیہیوئیر اینڈ الائیڈ سائنسز (آئی ایچ بی اے ایس) کا اچانک دورہ کرنے پہنچے۔ اس موقع پر انہوں نے دونوں اداروں کے مختلف وارڈز اور او پی ڈی کا دورہ کیا۔ ان اداروں میں زیر علاج مریضوں سے ملاقات کی اور ان کی خیریت معلوم کی۔ اداروں میں بد انتظامی کو ختم کرنے اور مریضوں کو صحت کی سستی اور معیاری سہولیات فراہم کرنے کی ہدایت دی۔
انہوں نے ہدایت کی کہ کینسر کے مریضوں کے علاج میں حائل رکاوٹوں کو فوری طور پر دور کیا جائے اور مریضوں کو فوری راحت فراہم کی جائے۔ وزیر صحت نے کہا کہ اس وقت کینسر ایک خوفناک بیماری بن کر ابھری ہے۔ یہ ایک بیماری ہے جو کسی بھی عمر میں ہو سکتی ہے۔ انہوں نے کہا کہ اگر ہم نے ملک کو کینسر سے پاک ملک بنانا ہے تو سب سے پہلے اس بیماری سے متعلق خرافات اور مسخ شدہ ذہنیت کو ختم کرنے کے لیے عوامی آگاہی کے پروگراموں کو تیز کرنا ہوگا۔ کیجریوال حکومت کا مقصد کینسر کے مریضوں کو بہتر زندگی دینا ہے۔ کیجریوال حکومت کی طرف سے دہلی اسٹیٹ کینسر انسٹی ٹیوٹ میں کینسر کا بہت سستا اور معیاری علاج دستیاب کرایا جا رہا ہے۔
وزیر صحت نے کہا کہ کیجریوال حکومت دہلی کے تمام لوگوں کو معیاری صحت خدمات فراہم کرنے کی سمت میں مسلسل کام کر رہی ہے۔ دہلی کے صحت کے بنیادی ڈھانچے کو دنیا کے بہترین اسپتالوں میں شامل کرنے کے لیے اسپتالوں کی اصلاح کی جارہی ہے۔ انہوں نے کہا، ’’ہمارا مقصد دہلی کے سرکاری اسپتالوں کو ملک کے بہترین اسپتالوں میں سے ایک بنانا ہے۔ وزیر اعلی اروند کیجریوال کی ہدایات کے بعد دہلی کے اسپتالوں میں علاج کی سہولت کو مزید قابل رسائی بنایا جا رہا ہے۔ اس کے علاوہ ضروری تبدیلیاں کر کے موجودہ اسپتالوں کو ایئر کنڈیشنڈ بنایا جا رہا ہے۔
یواین آئی
