ریاست مدھیہ پردیش کے ضلع نواڑي کے اورچھا تھانہ علاقہ میں ایک خاتون نے اپنے عاشق کے ساتھ مل کر شوہر کو گولی مار کر قتل کرنے کے بعد ٹرین سے كٹ كر خود کشی کر لی۔
اترپردیش پولیس نے دونوں کی لاشیں ٹرین کی پٹری سے برآمد کرنے کے بعد نواڑي پولیس کو اس کی اطلاع دی۔
پولیس ذرائع کے مطابق جمعرات کی شام اورچھا تھانے کے گاؤں مڈور میں سدھ بابا پہاڑی مندر کے نزدیک اتر پردیش کے چرگاؤں کے سنیل کشواہا کو گولی مار کر قتل کر دیا گیا تھا۔
سنیل اپنی بیوی پوجا کے ساتھ یہاں گھومنے کے لیے آیا ہوا تھا، شوہر کے قتل کے بعد پوجا اپنے عاشق کے ساتھ فرار ہو گئی۔ اس کے بعد کل اترپردیش پولیس نے نواڑي پولیس حکام کو ریلوے لائن پر دو لاشیں ملنے کی اطلاع دی۔
ریلوے ٹریک پر مہلوک سنیل کی بیوی پوجا اور اس کے عاشق پشپیندر کی لاشیں پائی گئیں۔
ان دونوں نے ٹرین سے كٹ كر خود کشی کر لی تھی۔ دونوں کے سر جسم سے جدا ہو گئے تھے۔ یہ اطلاع ملتے ہی پورا معاملہ صاف ہو گیا۔ اس سے قبل جمعرات کی دیر رات سنیل کے والد آسارام کشواہا نے اورچھا تھانے میں اپنے بیٹے کے قتل کی شکایت درج کرائی تھی۔
پولیس نے بتایا کہ سنیل کے قتل سے قبل پشپیندر پوجا سے ملنے چرگاؤں گیا تھا۔ بدھ کو وہ پوجا سے ملنے سنیل کے گھر آیا تھا۔ وہیں پر اس نے کھانا کھایا اور رات گزاری۔ رات کو ان تینوں نے ایک کمرے میں قیام کیا۔ پولیس کا خیال ہے کہ یہیں پر یہ واردات انجام دی گئی ہوگی۔
