ڈی سی بڈگام نے کووڈ-19 ویکسینیشن مہم کا جائزہ لیا

کووڈ-19 ٹیکہ کاری مہم کے بارے میں لوگوں تک جانکاری پہنچانے کے لیے ڈی سی بڈگام نے دیہی علاقوں میں پروگرام منعقد کرنے کے ہدایت دی اور متعلقہ تحصیلدار کو اپنے عملے کو اس کام کے لیے بروئے کار لانے پر زور دیا۔

وسطی کشمیر کے ضلع بڈگام میں ڈسٹرکٹ ڈیولپمنٹ کمشنر بڈگام شہباز احمد مرزا نے کووڈ-19 ٹیکہ کاری مہم کا جائزہ لینے کے لیے ایک اجلاس طلب کیا۔ اس میں اعلیٰ افسران سے ضلع میں کووڈ-19 کی ٹیکہ کاری مہم کے بارے میں جانکاری حاصل کی۔
اجلاس سے خطاب کرتے ہوئے ڈی سی بڈگام نے افسران پر زور دیا کہ وہ کووڈ-19 ایس او پیز پر عمل درآمد کریں۔ انہوں نے کہا کووڈ-19 مفت ٹیکہ لگانے کے دوران پروٹوکول پر عمل کرنا لازمی ہے اور ساتھ ہی لوگوں کو بھی اس سے آگاہ کیا جائے۔
ان کا مزید کہنا تھا کہ ضلع انتظامیہ کے پورے عملہ کو متحرک کیا جائے تاکہ وہ کسی بھی صورتحال سے نمٹنے کے لئے تیار ہوں، کیونکہ کووڈ-19 کی دوسری لہر تیزی سے پھیل رہی ہے۔ انہوں نے کہا کہ کووڈ-19 ویکسینیشن کے دوران آشا ورکروں کو بروئے کار لایا جائے اور ان سے 65 سال سے زیادہ عمر کے لوگوں کو مفت ٹیکہ لگوانے پر آمادہ کریں۔
کووڈ-19 ٹیکہ کاری مہم کے بارے میں لوگوں تک جانکاری پہنچانے کے لیے ڈی سی بڈگام نے دیہات میں پروگرام منعقد کرنے کے ہدایات دی اور متعلقہ تحصیلدار کو اپنے عملے کو اس کام کے لیے بروئے کار لانے پر زور دیا۔ انہوں نے کہا گاؤں کے چوکیدار، نمبردار اور مساجد کو اس مہم کو کامیاب بنانے کے غرض سے استعمال کیا جائے۔

کووڈ-19 ایس او پیز پر عمل نہ کرنے والوں کے ساتھ سختی سے نمٹا جائے گا اور جو اس ضمن میں منسٹری آف ہیلتھ نے پروٹوکول دیا ہے اس پر ہر حال میں عمل کرنا ہوگا۔ ضلع کے تمام سرکاری و غیر سرکاری اور نجی دفاتر میں بھی ان ایس او پیز پر عمل کرنا ضروری ہے۔

اجلاس میں سی ایم او بڈگام ڈاکٹر تجمل حسین خان نے کووڈ-19 ویکسینیشن مہم کا پورا خاکہ پیش کیا۔ انہوں نے اپنی پرزنٹیشن میں بتایا کہ 82 جگہوں پر ویکسینیشن کا بندوبست کیا گیا ہے جس میں سے 62 کام کر رہے اور باقی ماندہ تین دن کے اندر اندر شروع ہوں گی۔