دربھنگہ ۔ سمستی پور ریل جنکشن پر سیلاب کے پانی کی سطح میں اضافہ سے جہاں ریلوے کی آمدورفت متاثر ہوگئی ہے۔ وہیں اب سیلاب کے پانی کی طغیانی کی وجہ سے دربھنگہ۔ سمستی پور کو جوڑنے والی مین ریاستی شاہراہ پر کئی جگہ پانی کے تیز بہاؤ کی وجہ سے کٹاؤ ہونے لگا ہے۔
دربھنگہ ضلع انتظامیہ نے سیلاب پر قابو پانے کے لئے کافی جدوجہد شروع کر دی ہے- پہلا کٹاؤ دربھنگہ ضلع دفتر سے ٹھیک سات کلومیٹر کی دوری پر ڈیلاہی گاؤں کے پاس ہو رہا ہے جبکہ دوسرا کٹاؤ 8 کلومیٹر پر ہے اور اس سے آگے بھی کئی مقامات پر کٹاؤ جیسے حالات پیدا ہوگئے ہیں۔
پانی میں تیز لہر کی وجہ سے سڑک کے کنارے کٹاؤ کی کیفیت ہے، ایسے کٹاؤ والی جگہ پر ڈرام کی سیٹ سے حصار بنا کر گھیرا جا رہا ہے، ساتھ ہی بورے میں اینٹ پتھر رکھ کر اس کے کنارے رکھا جا رہا ہےتاکہ دربھنگہ۔سمستی پور کا یہ واحد راستہ ٹوٹ نہ سکے۔
ای ٹی وی بھارت نے کٹاؤ پر موجود پی ڈبلیو ڈی کے انجینئر سنیل کمار سے بات کی تو انہوں نے کہا کہ کٹاؤ بہت تیزی سے ہو رہا ہے، ہم لوگ دن رات محنت کررہے ہیں، کسی بھی صورت میں اس سڑک کو بند نہیں ہونے دیا جائے گا، تیزی سے ہم لوگ جہاں جہاں کٹاؤ ہو رہا ہے وہاں کٹاؤ کو بھرا جا رہا ہے ، یہ سڑک ٹریفک کی بھیڑ والی ہے، اگر یہ بند ہو جائے گی تو لوگوں کی زندگی ٹھہرجائے گی-
اب آگے دیکھنے والی بات یہ ہوگی کہ ضلع انتظامیہ دن و رات محنت کر کے اسے روکنے میں لگی ہوئی ہے یہ کوشش کس حد تک کامیاب ہوتی ہے۔
