ریاست بہار کے ضلع ارریہ و آس پاس کے علاقے میں رک رک کر ہو رہی بارش نے شہر کا نقشہ بگاڑ دیا ہے، بارش سے قبل کچھ دیر آسمان میں کالے بادل چھائے رہے اور پھر موسلادھار بارش ہونے لگی۔ محکمہ موسمیات نے ان دو دنوں میں سیمانچل کے ضلع ارریہ، پورنیہ اور کشن گنج کو ریڈ زون میں رکھا تھا، جبکہ مشرقی و مغربی چمپارن، گوپال گنج، سیوان، سارن، مدھوبنی، مظفرپور، دربھنگہ، ویشالی، شیوہر، سمستی پور، سپول، پورنیہ، سہرسہ اور مدھے پورا کو اوریج زون میں رکھا ہے۔ بتا دیں کہ ریڈ زون کا مطلب ان علاقوں میں بھاری بارش ہو سکتی ہے۔
ارریہ: بارش سے ضلع کلکٹریٹ جھیل میں تبدیل محکمہ موسمیات کے پیشن گوئی کے مطابق ہو رہی بارش سے شہر کے چاندنی چوک، بس اسٹینڈ، زیرو مائل، کورٹ احاطہ، ضلع کلکٹریٹ احاطہ جھیل میں تبدیل ہو گیا ہے، صبح سے ہی بارش جاری ہے۔ بارش کی وجہ سے بازار میں سناٹا پسرا ہوا ہے، سرکاری دفاتر میں بھی ملازمین کی تعداد کم دیکھی گئی اور افسران تاخیر سے اپنے دفتر پہنچے، بارش نے یومیہ مزدور کی روزی روٹی کو خاصا متاثر کیا ہے۔ وہیں بارش کی وجہ سے ضلع کلکٹریٹ جھیل میں تبدیل ہو گیا ہے۔ بارش کی وجہ سے مزدور طبقہ بھی باہر نہ نکلنے کو مجبور ہے۔ صبح سے ہو رہی بھاری بارش سے ضلع کے نشیبی علاقوں میں واقع ندی کی سطح اچھال دیکھنے کو مل رہا ہے، جوکی ہاٹ، رانی گنج ، بھرگامہ، سکٹی، فاربس گنج علاقے کے پرمان، مہانندہ، کنکئی اور داس ندیوں میں ندی کا کٹان بھی تیز ہو گیا ہے۔ جس سے ندی کے پاس بسنے والے عوام کی پریشانی بڑھ گئی ہے۔اس بارش نے نگر نگم کی ایک بار پھر سے پول کھول کر رکھ دی ہے، شہر میں جگہ جگہ پانی لگنے سے لوگوں کو آمد و رفت میں پریشانیوں کا سامنا کرنا پڑ رہا ہے تو کئی جگہوں پر کچڑے کا انبار لگا ہوا ہے، نالے کی صفائی نہ ہونے سے پانی سڑکوں پر بہہ رہا ہے۔ اس بابت نگر پریشد چیئرمین سے رابطہ کی کوشش کی گئی مگر رابطہ نہیں ہو سکا۔
