ارریہ: انٹرمیڈیٹ امتحان مراکز کا ضلع کلکٹر نے معائنہ کیا

بہار اسکول اگزامنیشن بورڈ پٹنہ کے تحت ریاست بھر میں انٹرمیڈیٹ کا امتحان گزشتہ تین دنوں سے جاری ہے، امتحان پورے صاف و شفاف ماحول میں منعقد ہو رہا ہے۔

ریاست بہار کے کسی بھی اضلاع سے کسی طرح کی کوئی بدعنوانی کا معاملہ اب تک سامنے نہیں آیا ہے۔

حالانکہ چند جگہوں پر نقل کرتے ہوئے کئی طلباء کو امتحان سے باہر کیا گیا ہے۔ اس سے اندازہ ہوتا ہے کہ بورڈ اس بار پوری طرح سخت ہے جس سے بدعنوانی کا اب تک کوئی معاملہ نہیں آیا ہے۔

ارریہ میں بھی ضلع انتظامیہ کی نگرانی میں انٹرمیڈیٹ کا امتحان بدعنوانی سے پاک لیا جا رہا ہے۔ ضلع کلکٹر پرشانت کمار نے آج کئی امتحان مراکز کا اچانک معائنہ کیا۔

ضلع کلکٹر شہر کے آزاد اکیڈمی آدرش مڈل اسکول الشمس ملیہ کالج، گرلس اسکول کھریا بستی، موہنی اسکول اچانک پہنچے مگر کسی طرح کی کوئی بدعنوانی نظر نہیں آئی۔ ساتھ ہی تمام مراکز پر طلباء کو سوشل ڈسٹنس اور سینیٹائزر و ماسک کا اہتمام کرتے ہوئے پایا۔

معائنہ کے دوران ضلع کلکٹر نے سینٹر سپرنٹنڈنٹ کو کئی ضروری ہدایات بھی دیں۔ ساتھ ہی کہا کہ کسی بھی قیمت پر سینٹر پر بغیر ماسک کے طلباء یا امتحان نگراں نہ پہنچے۔ ساتھ ہی طلباء کو اچھی طرح سے تلاشی کے بعد ہی امتحان گاہ میں داخل ہونے دیں۔


ارریہ ضلع میں اس وقت 31 مراکز پر انٹرمیڈیٹ کا امتحان چل رہا ہے۔ اب تک کل 4272 امتحان دہندگان میں 4212 شامل ہوئے ہیں جبکہ 60 طلباء غیر حاضر رہے ہیں۔ امتحان مراکز کے سو میٹر کے دائرے میں 144 نافذ ہے۔

ضلع میں چل رہے انٹرمیڈیٹ امتحان مراکز کا ضلع کلکٹر نے معائنہ کیا

حالانکہ اس دائرے کے بعد سے امتحان مراکز کے باہر گارجین حضرات کی اچھی خاصی بھیڑ دیکھنے کو مل رہی ہے۔

ضلع کلکٹر نے کہا کہ کسی بھی سینٹر پر کسی طرح کی کوئی بدعنوانی برداشت نہیں کی جائے گی، اس طرح سے اچانک معائنہ ہوتا رہے گا۔