بہار: آگ لگنے سے ایک ہی کنبہ کے تین افراد ہلاک

ضلع منگیر میں واقع ایک مکان میں آگ لگ گئی جس سے ایک ہی کنبہ سے تعلق رکھنے والے تین افراد کی موت ہو گئی۔ بتایا جا رہا کہ یہ آگ شارٹ سرکٹ سے لگی۔

یہ معاملہ ریاست بہار کے ضلع منگیر کے تاراپور سب ڈویژن کے تحت سنگرام پور پولیس اسٹیشن علاقے کا ہے۔ بتایا جارہا ہے کہ سنگرام پور تھانہ علاقہ کے گاؤں کہوا مشہری میں اچانک آگ بھڑک اٹھی۔ کہوا مشہری کے رہائشی بانو مانجھی کے گھر کو شارٹ سرکٹ کی وجہ سے آگ لگ گئی۔ اس آگ کی وجہ سے دولیا دیوی کی موت ہوگئی۔ دولیا دیوی کے ساتھ اس کی دو پوتیا شبری اور ستی کماری سو رہی تھی جس سے دونوں کی بھی موت ہو گئی۔

واقعے کی اطلاع ملنے کے بعد اتوار کی دیر رات ہی سنگرام پور تھانہ کی پولیس موقع پر پہنچی۔ آگ بجھانے کے لیے بہت کوشش کی گئی لیکن تب تک یہ تینوں آگ میں بری طرح جھلس گئے تھے۔ اسی دوران پولیس اور مقامی لوگوں نے کسی طرح گھر کے دوسرے افراد کو بحفاظت بچایا۔

مقامی انتظامی عہدیداروں نے بتایا کہ متاثرہ افراد کے اہل خانہ کو معاوضہ دیا جائے گا۔ پولیس اس معاملے کی تفتیش شروع کردی ہے۔