سشانت سنگھ راجپوت کی موت کی خبر سننے کے بعد ان کے والد جو بہار کے پٹنہ میں رہتے ہیں کی حالت بگڑ گئی۔ ان کی رہائش گاہ پر ہجوم جمع ہوگیا جبکہ سشانت کے والد کرشنا کمار سنگھ کسی سے بات کرنے کے موقف میں نہیں ہیں۔
پنٹہ میں واقع رہائش گاہ کی نگرانی کرنے والی لکشمی دیوی نے بتایا کہ سشانت سنگھ کی موت کی خبر بذریعہ ٹیلیفون موصول ہوئی۔ انہوں نے مزید بتایا کہ سشانت کی بڑی بہن جو چندی گڑھ میں رہتی ہیں وہ پٹنہ آرہی ہیں۔
سشانت سنگھ پورنیا ضلع کے بدھراکوٹھی میں واقع مالدیہ کے رہنے والے تھے، کچھ دن قبل وہ خاندان کی ایک دعوت میں شرکت کےلیے یہاں آئے تھے۔ یہاں کے لوگ ابھی تک ان کی خودکشی پر یقین نہیں کر پارہے ہیں۔
کچھ ماہ قبل سشانت ایک خاندانی پروگرام میں حصہ لینے کےلیے ضلع کھڈادیہ میں اپنے نانا کے گاؤں آئے تھے۔ سشانت سنگھ آج صبح اپنی ممبئی کے باندرہ میں واقع رہائش گاہ میں مردہ حالت میں پائے گئے۔
سشانت کا بچپن پٹنہ میں گذرا، وہ راجیو نگر کے رہائشی تھے۔ انہیں کرکٹ کا شوق تھا اور وہ سڑک پر اپنے دوستوں کے ساتھ کرکٹ کھیلا کرتے تھے۔
لکشمی دیوی نے بتایا کہ ’کچھ دن قبل سشانت نے اپنے والد کو فون کیا تھا اور انہیں سیرو تفریح کےلیے لیجانے کی بات کی تھی، لیکن سوشانت نہیں آئے جبکہ اس کے بجائے ان کی موت کی خبر آگئی‘۔
