سڑکوں پر تیز رفتار سے دوڑتی گاڑیوں نے لوگوں کا جینا محال کر دیا ہے، گزشتہ دنوں ہی ایک 5 سالہ بچی کی بیرگاچھی روڈ پر گاڑی کے ذریعے کچلے جانے سے درد ناک موت ہوئی تھی۔
گزشتہ روز ارریہ کے دو مختلف جگہوں پر بڑی گاڑی سے شدید ٹکر ہونے کے سبب دو لوگوں کی موت واقع ہوگئی۔
پہلا واقعہ شہر کے مرزا بھاگ بیریر کے پاس واقع ہوا جب شمشیر عالم نامی نوجوان (26) ارریہ سے اپنے گھر کی جانب موٹرسائیکل سے جا رہا تھا کہ اسی دوران جوکی ہاٹ کی طرف سے آ رہی تیز رفتار بولیرو گاڑی نے شمشیر کو کچل دیا۔
شمشیر کے اہل خانہ جب تک اسے صدر اسپتال لاتے تب تک درمیان راستے میں ہی اس نے دم توڑ دیا، موقع پر سے بلیرو گاڑی کا ڈرائیور بھاگنے میں کامیاب رہا جبکہ گاڑی کو پولس نے اپنی تحویل میں لے لیا ہے۔
جبکہ دوسرا واقعہ صبح 4 بجے کا ہے جب ایک شخص کا سامان لے کر بھاگ رہا ایک چور گاڑی سے ٹکرا گیا جس کے سبب موقع پر ہی اس کی موت ہوگئی۔
وارڈ نمبر 9 شیو پوری کے باشندہ شنکر نندن پرساد اپنی اہلیہ کے ساتھ پٹنہ کی بس سے مہادیو چوک کے پاس اترے تھے اتنے میں پہلے سے تاک لگائے بیٹھے دو چوروں نے ان پر حملہ کیا اور سامان کی چھین کر وہ بھاگنے لگے۔
بھاگنے کے دوران ہی ایک چور سامنے سے آ رہی ایک بڑی بس کے زد میں آ گیا جس سے موقع پر ہی اس کی موت ہو گئی جبکہ اس کا ساتھی بھاگنے میں کامیاب رہا۔
مرنے والے شخص کی شناخت آشیش کمار سنگھ عرف گڈو کے طور پر ہوئی ہے دونوں جگہوں پر پولس نے پہنچ کر لاش کو پوسٹ مارٹم کے لیے صدر اسپتال روانہ کردیا۔
