بہار کے ضلع گیا میں وزیراعلی اقلیتی اسٹوڈنٹس پرموشن اسکیم کے تحت انٹر امتحان میں فرسٹ آنے والی طالبات مستفید ہوں گی۔ اس اسکیم کے تحت انٹر کے امتحان میں فرسٹ ڈویژن سے کامیاب ہونے والی طالبات کو پندرہ ہزار روپے دیے جاتے ہیں جبکہ رواں سال 2022 میں 1754 طالبات فرسٹ ڈیویزن سے کامیاب ہوئی ہیں ان سبھی طالبات کو محکمہ اقلیتی بہبود نے دس دنوں میں کاغذات جمع کرنے کی ہدایت دی ہے۔ Promotion Money for Female Students
اس سلسلے میں ضلع اقلیتی فلاح کے افسر جتندر کمار نے بتایا کہ آئندہ ایک ہفتے کے اندر یعنی 20 جولائی تک فرسٹ ڈویژن سے کامیاب ہونے والی طالبات کو ہدایت دی گئی ہے کہ وہ اسکیم کے لیے درخواست دیں اور ساتھ ہی اسکول کے توسط سے بینک کھاتے کی تفصیل انٹر کی مارکشیٹ ایڈمٹ کارڈ آدھار کارڈ رہائشی سرٹیفیکیٹ مانگی گئی ہے۔ اس تعلق سے ضلع محکمہ تعلیم کو لیٹر بھی بھیجا جاچکا ہے وہ متعلقہ اسکول کو وقت سے پہلے کاغذات جمع کرنے کی ہدایت دیں کیونکہ گزشتہ برس دیکھا گیا ہے اسکول اور کالجز نے کاغذات بھیجنے میں دلچسپی نہیں دکھائی۔
واضح رہے کہ ضلع گیا میں اس مرتبہ لڑکیوں نے بہترین کارکردگی کا مظاہرہ کیا ہے گزشتہ برس 2021 میں 1196 طالبات ہی انٹر کے امتحان میں فرسٹ ڈویژن سے پاس ہوئیں تھی جبکہ 2020 میں کل تعداد 1360 تھی۔
