ریاست بہار کے دارالحکومت پٹنہ میں جنکشن کے تزئین و آرائش کا کام گزشتہ ایک برس سے چل رہا ہے اسی دوران پٹنہ جنکشن کے صدر دروازے پر آویزاں اردو میں جو بورڈ لگا تھا اسے ہٹا دیا گیا ہے،جس سے اردو داں طبقے میں زبردست تشویش ہے۔
ای ٹی وی بھارت کی پہل پر ریاستی اقلیتی کمیشن کے چیئرمین نے پٹنہ جنکشن کے اسٹیشن ڈائریکٹر سے رابطہ کرکے انہیں صدر دروازے پر فوراً اردو میں بورڈ لگانے کی اپیل کی۔
اردو داں طبقے کی ناراضگی کو دیکھتے ہوئے پٹنہ جنکشن کے اسٹیشن ڈائریکٹر ڈاکٹر نیلیش کمار نے پٹنہ جنکشن کا نام اردو میں جلد آویزاں کرانے کی یقین دہانی کرائی ہے۔
پندرہ نکاتی نفاذ کمیٹی کے سابق وائس چیئرمین عارف حسین نے کہا کہ پٹنہ جنکشن کے صدر دروازے سے اردو کا بورڈ غائب ہو جانا حددرجہ تشویشناک ہے، بھارتی ریلوے نے ہر جگہ علاقہ کے اعتبار سے اسٹیشنوں کا نام اردو میں لکھا ہے۔ انہوں نے کہا کہ پٹنہ ریل انتظامیہ نے کس سبب سے اردو کا نام ہٹا دیا یہ تحقیقات کا موضوع ہے، انڈین ریلوے کو اس کی تحقیقات کرنی چاہیے ایسا نہ ہو کہ پٹنہ جنکشن پر اردو دشمن موجود ہو۔
پٹنہ جنکشن کے اسٹیشن ڈائریکٹر ڈاکٹر نیلیش کمار نے بتایا کہ پہلے سے جو اردو کا بورڈ تھا تیزآندھی اور بارش کی وجہ سے وہ گرگیا، نیا بورڈ بن رہا ہے اور بہت جلد اسے لگا دیا جائے گا۔ انہوں نے کہا کہ جیسا بورڈ پہلے تھا اسی طرح کا بورڈ لگے گا انگلش اور ہندی میں جس طرح کا بورڈ نظر آ رہا ہے اسی طرح کا ہی بورڈ اردو میں بھی لگایا جائے گا۔ انہوں نے کہا کہ بورڈ بنانے کا آرڈر دیا گیا ہے ایک ہفتے کے اندر اسے لگا دیا جائے گا۔انہوں نے اردو داں طبقے سے صبر رکھنے کی اپیل کی۔
بہار ریاستی اقلیتی کمیشن کے چیئرمین پروفیسر یونس حسین حکیم نے کہا کہ اردو کے ساتھ کسی بھی طرح کی ناانصافی ہوگی تو اسے برداشت نہیں کیا جائے گا اردو یہاں کی دوسری سرکاری زبان ہے ۔انہوں نے کہا کہ اردو کو ہٹانے کی صلاحیت کسی میں نہیں ہے ایسا ہو سکتا ہے کہ بہتر کرنے کے لیے کچھ ہوا ہو، میں اسٹیشن ڈائریکٹر سے اس تعلق سے تفتیش کروں گا
اقلیتی کمیشن کے چیئرمین پروفیسر یونس حسین حکیم نے ای ٹی وی بھارت کی پہل پر پٹنہ جنکشن کے اسٹیشن ڈائریکٹر ڈاکٹر نیلیش کمار سے فون پر رابطہ کر کےجنکشن کے صدر دروازے پر اردو میں بورڈ آویزاں کرنے کی اپیل کی، اسٹیشن ڈائریکٹر نے انہیں ایک ہفتے کے اندر اردو میں بورڈ لگانے کی یقین دہانی کرائی۔
