بہار کی سیاست میں اپنے بیانوں سے سرخیوں میں رہنے والے مدھوبنی ضلع کے بسفی سے بی جے پی رکن اسمبلی ہری بھوشن ٹھاکر بچول نے آل انڈیا مجلس اتحاد المسلمین کے صدر اسدالدین اویسی کو طالبانی ذہنیت والا شخص قرار دیا ہے۔ صحافیوں سے بات کرتے ہوئے بچول نے کہا کہ اویسی دوسرے جناح بننا چاہتے ہیں لیکن وزیراعظم نریندر مودی کے رہتے ہوئے ایسا نہیں ہوگا۔
بچول نے کہا کہ اویسی جیسے لوگ فرقہ پسندانہ سوچ اور غزوہ الہند کی سوچ رکھنے والے ہیں۔ پاکستان اور افغانستان کی مسجدوں میں گولیاں چلتی ہیں، بھارت میں ایسا نہیں ہوتا۔
انہوں نے سوال کیا کہ افغانستان کے حالات پر 'لبرل گینگ' خاموش کیوں ہے۔ وہ افغانستان پر بات کیوں نہیں کر رہے ہیں؟
بچول نے کہا بھارت کے لوگ امن پسند ہیں، اور یہاں کسی کو حالات خراب کرنے کی اجازت نہیں دی جائے گی۔
- بارہ بنکی میں مسجد شہید کرانے والے افسر کا پرموشن کیا گیا: اویسی
- رام سنیہی گھاٹ کی مسجد پر بیان دے کر گھر گئے اویسی؟
انہوں نے کہا جو بھی لوگ شدت پسندی کی حمایت کرتے ہیں ایسے لوگوں کو یہاں رہنے کا کوئی حق نہیں ہے، وہ افغانستان چلے جائیں۔ وہاں پٹرول ڈیزل سستا ہے، مکان بھی سستا ہے۔ وہاں جاکر دیکھیں تب بھارت کے بارے میں بات کریں۔
