بہار میں کورونا کے معاملے میں ہو رہے اضافے کے پیش نظر ابھی تک مکمل لاک ڈاؤن نہیں لگا ہے، حالانکہ نائٹ کرفیو نو بجے کے بدلے شام 6 سے لگانے کا فیصلہ لیا گیا ہے اور شام چار بجے تک سبھی دکانیں بند ہوجائیں گی۔
محکمہ داخلہ کے ذریعہ جاری حکم نامے کے مطابق بہار میں رات نو بجے کے بدلے شام چھ بجے سے نائٹ کرفیو ہوگا جو صبح چھ بجے تک نافذ رہے گا۔ ریاست میں سبھی دکانیں اب شام چار 4 بجے تک ہی کھلیں رہیں گی۔ اس کے ساتھ ہی پوری ریاست میں دفعہ 144 لگانے کا فیصلہ کیا گیا ہے۔
سرکار نے شادی میں شریک ہونے والوں کی تعداد کم کر دی ہے۔ اب صرف 50 لوگ ہی شادی بیاہ کے پروگرام میں شامل ہو پائیں گے۔ پہلے شادی میں 100 لوگوں کے شامل ہونے کی اجازت تھی۔
اسی طرح شراد میں اب 25 لوگ ہی شامل ہوں گے، جبکہ آخری رسومات میں 20 لوگ ہی شامل ہو پائیں گے۔ یہ 15 مئی تک نافذ رہے گا۔
حکم نامے کے مطابق اس دوران سرکاری اور غیر سرکاری دفتروں میں صرف 24 فیصد ملازمین ہی ایک دن میں کام پر آئیں گے۔ سرکاری ملازم کو ورک فارم ہوم دینے کے لیے کہا گیا ہے۔ اس کے علاوہ مظفرپور میں کورونا کے مریضوں کے لیے ایک ہسپتال بنانے کا فیصلہ لیا گیا ہے۔
پبلک ٹرانسپورٹ کو صرف 50 فیصد مسافروں کے تحت چلانے کا حکم دیا گیا ہے۔ سرکولر کے مطابق ریسٹورینٹ رات 9 بجے تک کھلے رہیں گے، لیکن وہاں بیٹھ کر کھانے کی اجازت نہیں ہوگی، پیک کرا کر گھر لے جا سکیں گے۔
