بہار: این آئی اے کی ٹیم نے پٹنہ میں ٹیرر ماڈیول کیس کے حوالے سے بہار کے کئی اضلاع میں بیک وقت چھاپے مارے ہیں۔ سب سے پہلے ٹیم صبح سویرے دربھنگہ NIA Raid In Darbhanga پہنچی جہاں سنگھواڑا تھانہ علاقے میں کئی ملزمین کے گھروں پر چھاپے مارے۔ اس کے ساتھ ہی نالندہ ضلع میں بہار شریف کے سوہسرائے مہوا ٹولہ، لہری تھانے کے نادی موڑ اور بہار تھانہ کے گڑھپر محلہ میں بھی این آئی اے نے چھاپے ماری کی۔ اس دوران پولیس کی بڑی تعداد بھی یہاں موجود ہے۔ اس کے علاوہ این آئی اے موتیہاری اور پٹنہ میں کچھ مشتبہ افراد کے گھروں میں بھی چھان بین کی۔
دربھنگہ کے سنگھواڑا تھانہ علاقے کے شنکر پور کے رہنے والے محمد ذاکر کے بیٹے مستقیم اور اسی گاؤں کے ثناء اللہ عرف عاقب کے گھر پر چھاپہ مار کر تفتیش جاری ہے۔ وہیں این آئی اے کی ٹیم موتیہاری کے چکیہ کے کووان گاؤں میں واقع پی ایف آئی کے جنرل سکریٹری ریاض معروف عرف ببلو کے گھر کی تلاشی لے رہی ہے۔ اس معاملے میں وزارت داخلہ سے اجازت ملنے کے بعد اب این آئی اے نے تیزی سے جانچ شروع کر دی ہے۔
