پٹنہ: بہار کے نئے گورنر راجندر وشواناتھ ارلیکر کی حلف برداری راج بھون کے راجندر منڈپ میں منعقد ہوئی۔ اس لمحے کا گواہ کئی معزز لوگ بنے۔ حلف برداری کے لئے سب سے پہلے راجندر وشواناتھ دہلی سے سیدھے پٹنہ پہنچے جہاں پٹنہ ایئرپورٹ پر وزیر اعلیٰ نتیش کمار، نائب وزیر اعلیٰ تیجسوی یادو، بہار اسمبلی کے اسپیکر اودھ بہاری چودھری، بہار قانون ساز کونسل کے اسپیکر دویش چندر ٹھاکر، وزیر مالیات وجے کمار چودھری کے علاوہ درجنوں وزرا استقبال کے لئے کھڑے تھے۔ راجندر وشواناتھ پہنچنے کے بعد تمام لوگوں کا خیرمقدم قبول کرتے ہوئے یہاں سے سیدھے راج بھون پہنچے۔ اس سے قبل بھی ارلیکر ہماچل پردیش کی ذمہ داری نبھا چکے ہیں۔
نئے گورنر راجندر وشواناتھ ارلیکر دراصل گوا کے رہنے والے ہیں۔ بہار سے قبل انہوں نے ہماچل پردیش کا چارج سنبھالا تھا۔ محکمہ جنگلات کے وزیر ماحولیات کے ساتھ ساتھ وہ گوا حکومت میں محکمہ پنچایتی راج کے وزیر بھی رہ چکے ہیں۔ راج بھون کے احاطے میں منعقد حلف برداری تقریب میں وزیر اعلیٰ، نائب وزیر اعلیٰ سمیت مختلف اہم سیاسی شخصیات موجود تھیں۔ حالانکہ جے ڈی یو نے بہار میں گورنر کی تبدیلی کے معاملے پر مرکزی حکومت پر حملہ کیا ہے۔ جے ڈی یو لیڈر عبدالباقی نے کہا کہ بی جے پی صرف ان لوگوں کو گورنر بناتی ہے جو ان کے کل وقتی کارکن رہے ہوں۔ اب دیکھنا ہے کہ نئے گورنر اور عظیم اتحاد کے درمیان کیسا رشتہ رہتا ہے۔
