وزیراعلی نتیش کمار نے اپنے تعزیتی پیغام میں کہا ہے کہ آنجہانی لال جی ٹنڈن ایک مقبول رہنما، تجربہ کار ایڈمنسٹریٹر اور نامور ماہر تعلیم تھے۔ بہار کے گورنر کی حیثیت سے ان کی مدت کار ناقابل فراموش ہوگی۔
نتیش کمار نے کہا کہ لال جی ٹنڈن نے بہار میں اعلی تعلیم کی ترقی کو رفتاردی۔ اترپردیش میں بھی انہوں نے لکھنو کے رکن پارلیمنٹ اور ریاست کے مختلف محکموں کے وزیر کے عہدے پر فائز ہوتے ہوئے اپنی ذمہ داریوں کو موثر طریقے سے نبھایا۔ آنجہانی لال جی ٹنڈن سے میرے ذاتی تعلقات تھے اور ان کے انتقال کی خبر سن کر مجھے بہت صدمہ پہنچاہے۔
وزیر اعلی نے آنجہانی لال جی ٹنڈن کے صاحبزادے اور یوپی حکومت میں وزیر آشوتوش ٹنڈن اور صاحبزادے سبودھ ٹنڈن سے ٹیلیفون پربات کرکے انہیں صبر کی تلقین کی۔
آنجہانی لال جی ٹنڈن کے اعزاز میں بہار حکومت نے 21 جولائی کو ایک دن کے سرکاری سوگ کا اعلان کیا ہے۔ وزیراعلیٰ نے ان کی روح کی تسکین اوراہل خانہ و لواحقین کو غم کی اس گھڑی میں صبر کی قوت عطا کرنے کی دعا کی ہے۔
واضح رہے کہ بھارتیہ جنتا پارٹی کے بزرگ لیڈر ٹنڈن کا منگل کی صبح اترپردیش کے دار الحکومت لکھنو میں انتقال ہوگیا۔ وہ 85 سال کے تھے ۔ وہ گذشتہ کئی دنوں سے بیمار تھے اور ان کا لکھنو کے ایک اسپتال میں علاج چل رہا تھا۔
