بہار حکومت کے اقلیتی بہبود کے وزیر محمد زماں خان MINORITY WELFARE MINISTER ZAMAN KHAN اپنے آبائی علاقہ چین پور پہنچے۔ ساتھ ہی انہوں نے بلاک آفس میں واقع مرکزی دفتر کا افتتاح اور معائنہ کرنے کے بعد عوامی نمائندگان کے ایک اجلاس سے خطاب بھی کیا۔
اس موقع پر وزیر نے عوامی نمائندوں کو جیت کی مبارکباد پیش کی اور کہا کہ تمام عوامی نمائندے مل کر چین پور کی ترقی میں ایماندی سے کام کریں۔
انہوں نے کہا کہ چین پور ترقی کی نئی جہت اسی وقت حاصل کرے گا جب مقامی عوامی نمائندے تعاون کریں گے۔ تعاون کے بغیر ترقی کو تیز رفتاری کی طرف نہیں لے جایا جاسکتا۔
انہوں نے کہا کہ میں چین پور کی ترقی کے لیے ہر طرح سے تیار ہوں۔ وزیر بننے کے بعد پہلی بار چین پور بلاک دفتر آیا ہوں۔ آج بلاک پرمکھ دفتر کے افتتاح کا موقع ملا ہے۔
انہوں نے کہا کہ افتتاح کے اس موقع پر عوام سے ملنے کا یہ اچھا موقع ہے۔ وزیر نے چین پور پرمکھ مدھوبالا دیوی اور ڈپٹی پرمکھ نیئر انصاری کا شکریہ ادا کیا اور کہا کہ امید ہے کہ یہ دونوں پنچایت سمیتی کے تمام ممبران کو اپنے ساتھ لے کر چلیں گے اور عوام کی طرف سے دی گئی ذمہ داری کے تئیں حساس ہوں گے۔
انہوں نے کہا کہ بلاک آفس سے مسلسل شکایات موصول ہو رہی ہیں۔انہوں نے کہا جن افسران کے خلاف شکایت موصول ہوتی ہیں تو ان کے حلاف کارروائی کی جائے گی۔ اس لیے بہتر ہے کہ اپنی ذمہ داریاں ایمانداری سے ادا کریں۔ بدعنوانی برداشت نہیں کی جائے گی۔
انہوں نے کہا کہ چین پور میں اعلیٰ تعلیم کی کمی کو دور کرنے کے لئے متعدد اقدام اٹھائے جائیں گے۔
اس موقع پر چین پور بلاک کے بلاک ڈیولپمنٹ آفیسر اعجاز الدین احمد چین پور سرکل آفیسر پریندر کمار سنگھ کے ساتھ بلاک آفس کے دیگر ملازمین اور نو منتخب عوامی نمائندے موجود تھے۔
