تعزیتی پروگرام سے خطاب کرتے ہوئے نائب امیر شریعت مولانا شمشاد رحمانی قاسمی نے کہا کہ مفتی عبدالشکور صاحب ہمہ جہت شخصیت کے حامل عالم دین تھے، قدرت نے انہیں بے پناہ صلاحیتوں سے نوازا تھا، ان کی نظر مختلف علوم و فنون پر بڑی گہری اور وسیع تھی، ایسی خوبیوں اور صلاحیتوں کے عالم دین کا ہمارے درمیان سے اٹھ جانا ایک بڑا علمی خسارہ ہے۔
قائم مقام ناظم مولانا شبلی قاسمی نے کہا کہ مولانا کے مزاج میں سادگی و سنجیدگی اور فکر و نظر میں وسعت و بلندی تھی، وہ کام کو منظم انداز کے ساتھ انجام دیا کرتے تھے۔
نائب ناظم مولانا مفتی ثناء الہدیٰ قاسمی نے اظہار تعزیت کرتے ہوئے کہا کہ مولانا سے میری دیرینہ بیس سالہ رفاقت رہی، وہ ایک اچھے مدرس بھی تھے اور صاحب بصیرت فقیہ بھی، انہوں نے عرصہ تک مدرسہ احمدیہ ابوبکر پور ویشالی میں تدریسی خدمات انجام دیں اور باکمال رجال تیار کیے، ان کی ہر فن پر چاہے وہ صرف و نحو ہو یا منطق و فلسفہ، باریک نگاہ تھی۔
یہ بھی پڑھیں: کشن گنج: سوفیصد ویکسینیشن کے لئے 31 اگست کو خصوصی ویکسینیشن مہم: ڈی ایم
مولانا مفتی وصی احمد قاسمی نے کہا کہ مولانا خوش اخلاق، منکسرالمزاج اور متواضع عالم دین تھے، امانت داری کا وصف ایسا نمایاں تھا کہ جب ان پر ضعف و علالت اور نقاہت کا غلبہ ہوا تو کار قضاء کی ذمہ داری کسی اور کے سپرد کرنے کی درخواست کی. اخیر میں نائب امیر شریعت کی رقت آمیز دعا پر تعزیتی نشست اختتام پذیر ہوئی۔
