چارہ بدعنوانی کیس میں سزا پانے والے راشٹریہ جنتا دل کے صدر لالو پرساد یادو جھارکھنڈ کے ہسپتال میں 2 برس سے زیادہ کے عرصے سے زیر علاج ہیں۔
ہسپتال میں سب سے طویل مدت تک زیر علاج رہنے والے وہ واحد سیاستداں ہیں جبکہ بی جے پی نے انہیں فوری جیل منتقل کرنے کا مطالبہ کیا ہے۔
بی جے پی نے الزام عائد کیا کہ آر جے ڈی صدر ایک مریض کی حیثیت سے ہسپتال میں رہنے کے تمام ریکارڈ توڑ دیے ہیں۔ اس کے جواب میں آر جے ڈی نے کہا کہ بہار انتخابات کے پیش نظر بی جے پی لالو فوبیا سے متاثر ہوچکی ہے۔
ڈاکٹر امیش پرساد نے کہا کہ 'ان کی حالت ابھی مستحکم ہے کیونکہ بلڈ پریشر اور شوگر لیول دونوں قابو میں ہے۔ ہم اسے بہت برا یا بہت اچھا نہیں کہہ سکتے ہیں۔'
انہوں نے مزید کہا کہ 'جس چیز پر نظر رکھنی ہے وہ یہ ہے کہ ان کی ذیابیطس قابو میں رہے اور گردے بہتر کام کرتے رہیں۔'
دو برس سے زیادہ عرصے سے رمز ہسپتال میں ان کے قیام کے بارے میں پوچھا گیا تو ڈاکٹر پرساد نے کہا کہ 'لالو پرساد یادو کی دیکھ بھال ریاستی حکومت کو کرنا ہوگا اور ان کا فرض ہے کہ وہ ہسپتال میں قیام تک ان کے ساتھ اچھا سلوک کرے۔'
