بہار کے ضلع کیمور کے درگاوتی علاقہ میں ایک نہر کے قریب موٹر سائیکل سوار کی موت ہوگئی جبکہ ایک بری طرح سے زخمی ہو گیا۔ زخمی نوجوان کی حالت تشویشناک ہونے پر اسے وارانسی ہسپتال منتقل کردیا گیا ہے۔ حادثے کے پیچھے کی وجہ یہ بتائی جارہی ہے کہ نیل گائے اچانک موٹر سائیکل سوار کے سامنے آگئی۔ جس کی وجہ سے حادثہ پیش آیا ہے۔
واقعے کے بعد جاں بحق افراد کے لواحقین میں غم و غصہ پایا جاتا ہے۔ پولیس نے لاش کو اپنے قبضہ میں لے کر پوسٹ مارٹم کے لیے بھیج دیا ہے اور واقعے کی چھان بین شروع کردی ہے۔
یہ بھی پڑھیے
کیمور: شادی کی تقریب میں نوجوان کا قتل
بتایا جارہا ہے کہ کملا یادو ولد رامپتی یادو اور پنکج پال ولد شیو بچن پال اپنی بہن کو مہوریا میں چھوڑ کر واپس موٹرسائیکل سے جارہے تھے۔ جیسے ہی موٹرسائیکل سوار ایتھی گاؤں کے قریب پہنچے، اچانک ان کی موٹر سائیکل کے سامنے نیل گائے آگئی۔ سامنے نیل گائے کو اچانک دیکھتے ہی موٹرسائیکل سوار گھبرا گئے اور کچھ فاصلہ طے کرنے کے بعد موٹر سائیکل پلٹ کر حادثہ کا شکار ہو گئی۔
اس واقعے میں کملا یادو کو شدید چوٹیں آئیں اور وہ موقع پر ہی ہلاک ہو گیا۔ جبکہ دوسرے زخمی شخص کو ہسپتال میں داخل کرایا گیا ہے۔
