گیا:بہار کے عازمین حج کی پرواز کو لے کر گیا ہوائی اڈہ تکنیکی طور پر بھی تیاریوں میں مصروف ہے ، حج پرواز سے قبل گیا ہوائی اڈہ بین الاقوامی معیار کے مطابق اعلیٰ معیار کی ٹیکنالوجی کے ساتھ کام کرنا شروع کر دے گا۔ اس کی تمام تیاریاں مکمل کر لی گئی ہیں۔ اعلیٰ معیار کا نیا ورژن فلائٹ کی لینڈنگ، سیکیورٹی اور ایئر ٹریفک کنٹرول کے لیے کارآمد ثابت ہوگا۔ حالانکہ یہ عام دنوں کے لیے بھی ہے اور اس سے گیا ایئرپورٹ اعلی معیار کی تکنیک والے ایئرپورٹ میں شمار ہوگا۔
چونکہ گیا ایئرپورٹ سیاحتی نقطہ نظر سے بھی کافی اہم ہے اور یہاں ملک سمیت بیرون ممالک کے طیاروں کی لینڈنگ ہوتی ہے ،نئی ٹکنالوجی سے مزین کرنے کے لیے ایئرپورٹ کے احاطے کے اندر ایک نئی عمارت بھی تعمیر ہوچکی ہے۔ ساتھ ہی پرانے اے ٹی سی ٹاور کی جگہ نیا ٹاور بنکر مکمل ہو چکا ہے۔
ہوائی اڈے کے ڈائریکٹر بنگجیت شاہا نے اس کی تصدیق کی ہے۔انہوں نے بتایا کہ گیا کے ہوائی اڈے پر اگلے 10 دنوں میں بین الاقوامی ٹیکنالوجی کام کرنا شروع کر دے گی۔ اس کی تیاری مکمل کر لی گئی ہے۔ گیا ایئرپورٹ کو اس نئی ٹیکنالوجی سے کافی فائدہ ملے گا۔ انہوں نے کہا کہ گیا ہوائی اڈہ اب پرواز، لینڈنگ، سیکورٹی اور ہوائی ٹریفک کے معاملے میں بین الاقوامی معیار پر پورا کھرا اترے گا۔پہلے بھی اس پورٹ پر سبھی طرح کے نظام بحال تھے جو ایک ایئرپورٹ پر ہوتے ہیں تاہم اس کو مزید بڑا کرنے کے ساتھ نئی ٹکنالوجی کا استعمال کیا گیا ہے۔
گیا ایئرپورٹ ملک اور بیرون ملک کے لیے سیاحت کے نقطہ نظر سے بہت اہم ہے۔اکتوبر سے مارچ تک اس ہوائی اڈے پر بین الاقوامی ہوائی سروس دستیاب ہوتی ہے۔ گیا ہوائی اڈے کو اس سے کافی فائدہ ملتا ہے اس کے ساتھ سیاح بھی اس سہولت سے بھرپور فائدہ اٹھاتے ہیںؤ اکتوبر سے مارچ تک بڑی تعداد میں ملکی اور غیر ملکی بدھ مت کے عقیدت مند بودھ گیا میں مہابودھی مندر دیکھنے کے لیے گیا ہوائی اڈے پر آتے ہیں اس کے علاوہ وہ مہاتماگوتم بدھ سے جڑی دوسری جگہوں پر بھی جاتے ہیں۔
