بہار کے ضلع گیا کے ڈسٹرکٹ مجسٹریٹ ابھشیک کمار سنگھ نے عیدالاضحیٰ کے موقع پر گیا کے تمام باشندوں کو ٹویٹر کے ذریعے مبارکباد پیش کرتے ہوئے کہا کہ 'ہیپی عیدالاضحیٰ'۔ تو وہیں صحافیوں کو پریس ریلیز کے توسط سے مبارک باد کا پیغام دیا ہے۔
ساتھ ہی ڈسٹرکٹ مجسٹریٹ ابھشیک کمار سنگھ نے ضلع کے باشندوں سے اپیل کی ہے کہ 'عید قرباں' کو ہم آہنگی اور آپسی بھائی چارہ و اتحاد کے ساتھ منائیں۔'
اس تہوار کو پرسکون، پرامن اور خوشگوار ماحول میں منائیں اور ساتھ ہی ضلع گیا میں امن وامان کو برقرار رکھیں، پوری دنیا اس وقت مہلک بیماری 'کورونا وبا' سے متاثر ہے اور اس وبا سے سبھی جوجھ رہے ہیں، وبا کی وجہ سے ہم ایک نازک وقت سے گزر رہے ہیں لہذا ہم سب کو اس تہوار کو کورونا ہدایتوں پر عمل کرتے ہوئے منانا چاہئے۔'
یہ بھی پڑھیں: جامع مسجد دہلی سمیت ملک بھر میں نماز دوگانہ ادا، قربانی کا سلسلہ جاری
ساتھ ہی ڈسٹرکٹ مجسٹریٹ ابھشیک کمار سنگھ نے مسلمانوں سے گزارش کرتے ہوئے کہا ہے کہ اس مقدس دن جو قربانی اور اخلاص کا دن ہے ایسے دن میں ہم سب خدا سے دعا کریں کہ ہمارا ضلع، ریاست اور پوری قوم کورونا وبا اور دیگر وبائی مرض اور بیماریوں سے ہمیشہ محفوظ رہے۔
