بہار کے صبا کریم کے ارریہ پہنچنے پر ارریہ ضلع کرکٹ یونین کے عہدے دار نے سرکٹ ہاؤس میں ان کا شاندار استقبال کیا اور انہیں مومنٹو پیش کیا۔ ساتھ ہی ارریہ کے عظیم ادیب فنیشور ناتھ رینو کی کتاب انہیں ہدیہ کی۔
اس موقع پر صبا کریم سے ارریہ کے درجنوں کھلاڑی سے ملاقات کی اور کرکٹ کی باریکیوں کو سمجھایا۔ صبا کریم نے خوشگوار ماحول میں تمام کرکٹرز سے ملاقات کر ان کی حوصلہ افزائی کی، کئی کھلاڑیوں نے کیپرنگ کے حوالے سے سوالات کئے۔
ٹیم انڈیا کے سابق وکٹ کیپر، مایہ ناز بلے باز صبا کریم نے ارریہ کے کرکٹ کھلاڑیوں کی جم کر ستائش کی۔ انہوں نے کہا کہ مجھے معلوم ہوا یہاں کے کرکٹرز میں کرکٹ کو لیکر کافی دیوانگی ہے۔ گاؤں گاؤں میں کرکٹ کو لیکر ایک جنون ہے۔
انہوں نے کہا کہ یہاں کے کھلاڑیوں میں صلاحیت کی کوئی کمی نہیں ہے۔ انہیں ضرورت ہے تو ایک بہترین پلیٹ فارم کی ہے۔ بہار کرکٹ بورڈ کو اب جبکہ بی سی سی آئی منظوری مل چکی ہے تو امید ہے اب یہاں کے کرکٹرز بھی قومی سطح پر اپنے فن کا مظاہرہ کرپائیں گے۔
صبا کریم نے کہا کہ مجھے ذاتی طور پر یہاں آکر بہت اچھا محسوس ہو رہا ہے۔ یہاں کے کھلاڑیوں سے مل کر خوشی ہو رہی ہے۔ ارریہ ضلع کرکٹ یونین کے عہدے دار بہت محدود وسائل میں رہ کر اچھا کام کر رہے ہیں۔ میری کوشش ہوگی کہ یہاں کے کھلاڑیوں کو ایک اچھا پلیٹ فارم ملے تاکہ ان کی صلاحیت میں نکھار آئے۔ اس موقع پر ارریہ کرکٹ یونین کے تمام عہدے دار موجود تھے.
